پاکستان اور بھارت کے شہریوں نے مل کر کینیڈا والوں سے فراڈ کرلیا

پاکستان اور بھارت کے شہریوں نے مبینہ طور پر مل کر کینیڈا میں بینک فراڈ کیا، جس کا انکشاف ہونے پر این سی سی آئی اے لاہور نے کارروائی کرتے ہوئے تین پاکستانی ملزمان کو گرفتار کرلیا۔ حکام کے مطابق ملزمان کینیڈا میں موجود بھارتی شہریوں کے ساتھ رابطے میں تھے اور مصنوعی ذہانت کی مدد سے تیار کردہ دستاویزات کے ذریعے مختلف بینکوں میں اکاؤنٹس کھول کر کریڈٹ کارڈز حاصل کرتے اور استعمال کرتے تھے۔

این سی سی آئی اے لاہور نے چند روز قبل کارروائی کرتے ہوئے تین ملزمان کو گرفتار کیا ہے، جو پاکستان میں بیٹھ کر کینیڈا میں مبینہ طور پر فراڈ کر رہے تھے۔ این سی سی آئی اے حکام کے مطابق تین پاکستانی شہری یہ فراڈ بھارت کے شہریوں کے ساتھ مل کر کر رہے تھے۔

حکام کے مطابق بھارت کے چار شہری کینیڈا میں موجود تھے، جو پاکستان کے تین شہریوں سے رابطے میں تھے۔ پاکستان سے گرفتار ہونے والے تینوں شہری لا کے طالب علم تھے۔

تحقیقات کے مطابق کینیڈا میں موجود ملزمان مصنوعی ذہانت (اے آئی) کی مدد سے پاسپورٹ اور دیگر دستاویزات تیار کرکے پاکستانی شہریوں کو بھیجتے تھے۔ پاکستانی شہری Dolphin Anti نامی ایپلی کیشن کے ذریعے کینیڈا کے مختلف بینکوں میں اکاؤنٹس کھولتے تھے، جبکہ بائیومیٹرک اور تصاویر کی تصدیق کا عمل بھی پاکستان میں بیٹھ کر مکمل کیا جاتا تھا۔

بینک اکاؤنٹ کھلنے کے بعد متعلقہ بینک کا کریڈٹ کارڈ ان دستاویزات میں درج پتے پر پہنچ جاتا تھا، جہاں اسے استعمال کیا جاتا تھا۔

متعدد شکایات سامنے آنے پر کینیڈین بینکوں نے تحقیقات شروع کیں، جس کے بعد پاکستانی ادارے بھی تحقیقات کا حصہ بنے اور لاہور سے تینوں ملزمان کو گرفتار کر لیا گیا۔

گرفتار ملزمان کے قبضے سے چار موبائل فون، چار لیپ ٹاپ اور جعلی کینیڈین پاسپورٹس کی پرنٹ شدہ نقول برآمد ہوئی ہیں۔