بانی پی ٹی آئی سے جیل میں ملاقات کی درخواست اسلام آباد ہائیکورٹ میں سماعت کے لیے مقرر

اسلام آباد ہائیکورٹ نے بانی پی ٹی آئی سے جیل میں ملاقات کے لیے نیشنل ڈائیلاگ کمیٹی کے ارکان کی درخواست 5 نومبر کو سماعت کے لیے مقرر کر دی ہے۔ عدالت کے جسٹس عمیر مجید ملک جمعرات کو اس درخواست پر سماعت کریں گے۔ یہ درخواست رجسٹرار آفس کے اعتراضات کے ساتھ سماعت کے لیے مقرر کی گئی ہے جسے سینئر وکیل فیصل فرید چوہدری کے توسط سے دائر کیا گیا ہے۔

درخواست گزاروں میں سابق وفاقی وزیر فواد چوہدری، سابق گورنر عمران اسماعیل، محمود مولوی اور بیرسٹر سیف شامل ہیں۔ درخواست میں سیکرٹری داخلہ، سیکرٹری ہوم پنجاب اور سپرنٹنڈنٹ اڈیالہ جیل کو فریق بنایا گیا ہے۔ دستاویزی مؤقف کے مطابق بانی پی ٹی آئی اور بشریٰ بی بی کی صحت پر شدید تشویش پائی جاتی ہے جبکہ جیل حکام کے مبینہ نامناسب رویے اور بدسلوکی پر بھی تحفظات کا اظہار کیا گیا ہے۔

درخواست میں مؤقف اختیار کیا گیا ہے کہ بانی پی ٹی آئی کے اہلِ خانہ اور دوستوں کو کئی ماہ سے ملاقات کی اجازت نہیں دی جا رہی جس سے سوشل میڈیا پر افواہوں کو ہوا مل رہی ہے۔ مزید برآں، ملاقاتوں پر پابندی کو آئین کے آرٹیکل 9 اور 14 کے ساتھ ساتھ اقوام متحدہ کے نیلسن منڈیلا رولز کی خلاف ورزی قرار دیا گیا ہے۔ دریں اثنا، پشاور میں میڈیا سے گفتگو کرتے ہوئے چیئرمین پی ٹی آئی بیرسٹر گوہر نے بیرسٹر سیف کے دعوؤں کو مسترد کرتے ہوئے کہا کہ بانی پی ٹی آئی سے ملاقات کے لیے ہر ممکن کوشش کی گئی ہے اور تمام دعوے بے بنیاد ہیں۔