کرسٹیانو رونالڈو کا پرتگال کی قومی ٹیم سے ریٹائرمنٹ کا اعلان

دنیا کے معروف فٹبالر کرسٹیانو رونالڈو نے پرتگال کی قومی فٹبال ٹیم سے ریٹائرمنٹ کا اعلان کردیا ہے۔ ان کا 23 سالہ انٹرنیشنل کیریئر نومبر کے بین الاقوامی میچز کے بعد اختتام پذیر ہوجائے گا۔

خبر رساں ادارے رائٹرز کے مطابق 41 سالہ رونالڈو نے جمعرات کو سوشل میڈیا پر اپنے فیصلے کا اعلان کرتے ہوئے کہا کہ اب پرتگال کی قومی ٹیم کی نمبر 7 جرسی کسی اور کھلاڑی کے حوالے کرنے کا وقت آگیا ہے۔

رونالڈو نے اگست 2003 میں 18 سال کی عمر میں پرتگال کی قومی ٹیم کے لیے ڈیبیو کیا تھا۔ انہوں نے اپنے انٹرنیشنل کیریئر کے دوران 234 میچز کھیلے اور 146 گول اسکور کیے، جو مردوں کے بین الاقوامی فٹبال میں سب سے زیادہ گولز کا عالمی ریکارڈ ہے۔

واضح رہے کہ اکتوبر میں نیشنز لیگ کے دوران ناروے کے خلاف میچ میں بینچ پر بٹھائے جانے کے بعد رونالڈو پرتگال کے تربیتی کیمپ سے چلے گئے تھے۔ بعد ازاں انہوں نے کہا تھا کہ وہ انٹرنیشنل فٹبال سے ریٹائر نہیں ہورہے اور قومی ٹیم کے لیے دستیاب رہیں گے، تاہم اب انہوں نے ریٹائرمنٹ کا فیصلہ کرلیا ہے۔