صنم جاوید خان کا شوہر سے علیحدگی کا اعلان، میڈیا سے قیاس آرائیوں سے گریز کی اپیل

پاکستان تحریک انصاف (پی ٹی آئی) کی سرگرم رہنما اور سوشل میڈیا ایکٹوسٹ صنم جاوید خان نے اپنے شوہر عتیق ریاض کے ساتھ تمام ازدواجی تعلقات کے خاتمے کا باضابطہ اعلان کر دیا ہے۔ اس سلسلے میں انہوں نے لاہور کی فیملی کورٹ میں خلع کا دعویٰ دائر کر دیا ہے جس کی باضابطہ تصدیق کر دی گئی ہے۔

دستاویز اور عدالتی ذرائع کے مطابق صنم جاوید کی جانب سے یہ درخواست ان کی قانونی وکیل بیرسٹر خدیجہ صدیقی کے توسط سے دائر کی گئی ہے۔ عدالت میں جمع کروائی گئی درخواست میں مؤقف اختیار کیا گیا ہے کہ اب شوہر کے ساتھ مزید ازدواجی رشتہ قائم رکھنا ممکن نہیں رہا، لہٰذا عدالت خلع کی ڈگری جاری فرمائے۔ فیملی کورٹ نے اس معاملے پر ابتدائی کارروائی کا آغاز کرتے ہوئے عتیق ریاض کو 25 نومبر کے لیے نوٹس جاری کر کے جواب طلب کر لیا ہے۔

میڈیا پر مختلف خبریں گردش میں آنے کے بعد صنم جاوید کے براہِ راست پیغام پر ان کا موقف بلا مبہم واضح کیا گیا ہے کہ ان کا اب اپنے شوہر سے کسی بھی قسم کا کوئی تعلق باقی نہیں رہا ہے۔ اس پیش رفت کے بعد ان کی جانب سے تمام میڈیا ہاؤسز، صحافیوں اور سوشل میڈیا مبصرین سے پرزور اپیل کی گئی ہے کہ چونکہ یہ ان کا انتہائی حساس اور ذاتی خاندانی معاملہ ہے، اس لیے اس پر کسی بھی قسم کی غیر ضروری قیاس آرائیوں اور افواہوں سے مکمل گریز کیا جائے۔

واضح رہے کہ صنم جاوید اور عتیق ریاض کا نکاح سال 2009 میں ہوا تھا اور ان کے 2 بچے ہیں۔ پی ٹی آئی کی یہ خاتون رہنما اس وقت 9 مئی کے مختلف مقدمات کے سلسلے میں قانونی کارروائی اور قید کا سامنا کر رہی ہیں۔