بھارت کے خطے میں زیادہ آزاد ہونے کے دعوے بے بنیاد نکلے

امریکی سفارت خانے کے سرکاری بیان میں کہا گیا کہ امریکا اور آسٹریلیا ایسے آزاد ممالک ہیں جہاں شہریوں کو اپنی مرضی کے مطابق اظہارِ رائے، ووٹ دینے اور مذہبی آزادی حاصل ہے، جبکہ چین میں یہ آزادیاں شہریوں کو میسر نہیں ہیں۔

شیئر کیے گئے نقشے میں امریکا اور آسٹریلیا کو نیلے رنگ میں ’’آزاد‘‘ جبکہ چین کو سرخ رنگ میں ’’غیر آزاد‘‘ ممالک کے طور پر دکھایا گیا ہے۔

فریڈم ہاؤس کی عالمی رپورٹ 2026 کے مطابق دنیا میں آزادی مسلسل 20ویں سال تنزلی کا شکار رہی۔ رپورٹ میں امریکا کے آزادی کے اسکور میں بھی تین پوائنٹس کی کمی ریکارڈ کی گئی، جس کے بعد اس کا مجموعی اسکور 100 میں سے 81 رہ گیا، تاہم امریکا اب بھی آزاد ممالک کی فہرست میں شامل ہے۔

رپورٹ کے مطابق چین کا اسکور تقریباً 9 پوائنٹس ہے اور اسے غیر آزاد ممالک کے زمرے میں رکھا گیا ہے، جبکہ آسٹریلیا آزاد ممالک میں شامل ہے۔

فریڈم ہاؤس کی رپورٹ میں یہ بھی بتایا گیا ہے کہ دنیا کی صرف 21 فیصد آبادی ایسے ممالک میں رہتی ہے جنہیں آزاد قرار دیا گیا ہے، جبکہ دو دہائیاں قبل یہ شرح 46 فیصد تھی۔

امریکی سفارت خانے کی اس پوسٹ پر سوشل میڈیا صارفین کی جانب سے مختلف ردعمل سامنے آیا۔ بعض صارفین نے امریکا میں آزادی کی صورت حال پر سوالات اٹھائے، جبکہ کچھ نے چین میں اظہارِ رائے، انتخابی اور مذہبی آزادیوں کے حوالے سے رپورٹ کے مؤقف کی حمایت کی۔

یہ پیغام ایسے وقت میں سامنے آیا ہے جب امریکا اور آسٹریلیا خطے میں چین کے بڑھتے ہوئے اثر و رسوخ کے تناظر میں اپنے تعلقات اور مشترکہ پالیسی مؤقف کو مزید نمایاں کر رہے ہیں۔