پی ٹی اے کا فکسڈ لائن براڈبینڈ سروسز کے معیار کا سروے مکمل، خامیوں کی نشاندہی

پاکستان ٹیلی کمیونیکیشن اتھارٹی (پی ٹی اے) نے ملک بھر میں فکسڈ لائن براڈبینڈ سروسز کے معیار کی جانچ کے لیے تفصیلی سروے مکمل کر لیا ہے۔ اس حوالے سے جاری کردہ تفصیلات کے مطابق 2026 کی تیسری سہ ماہی کے دوران ملک کے بڑے شہروں اور گلگت بلتستان میں براڈبینڈ سروسز کی کارکردگی کا بھرپور جائزہ لیا گیا۔

پی ٹی اے کے جاری کردہ بیان کے مطابق براڈبینڈ فراہم کرنے والی کمپنیوں کی کارکردگی کو مقررہ معیارات کی روشنی میں پرکھا گیا، جبکہ نیٹ ورک کی دستیابی، ڈیٹا کی رفتار اور دیگر اہم تکنیکی اشاریوں کا بھی باریک بینی سے جائزہ لیا گیا۔

سرکاری دستاویز کے مطابق براڈبینڈ نیٹ ورکس میں بینڈوتھ کے استعمال، ڈیٹا کی ترسیل کی رفتار اور صارفین کو فراہم کی جانے والی انٹرنیٹ سہولیات کے عملی معیار کی بھی جانچ کی گئی۔ سروے کے دوران انٹرنیٹ سروسز کے معیار میں بعض خامیوں اور بہتری کے درکار شعبوں کی نشاندہی کی گئی ہے۔ پی ٹی اے کا کہنا ہے کہ کارکردگی میں خامیاں سامنے آنے پر متعلقہ آپریٹرز کو فوری طور پر اصلاحی اقدامات کی ہدایات جاری کی جا رہی ہیں۔

اتھارٹی نے فکسڈ لائن براڈبینڈ سروسز کے معیار میں بہتری کے لیے اپنے عزم کا اعادہ کرتے ہوئے کہا ہے کہ صارفین کو بہتر، معیاری اور قابلِ اعتماد انٹرنیٹ سہولیات کی فراہمی ان کی اولین ترجیح ہے۔