140 سال بعد مسیسیپی سے پہلا سیاہ فام سینیٹر منتخب

امریکی ریاست مسیسیپی میں ڈیموکریٹ امیدوار اسکاٹ کولم نے ری پبلکن جماعت کی طویل انتخابی بالادستی ختم کرتے ہوئے سینیٹ کی نشست اپنے نام کرلی۔ اس کامیابی کے ساتھ وہ تعمیرِ نو کے دور کے بعد ریاست سے منتخب ہونے والے پہلے سیاہ فام امریکی سینیٹر بن گئے۔

امریکی میڈیا کے مطابق اسکاٹ کولم نے سخت مقابلے کے بعد ری پبلکن جماعت کی موجودہ سینیٹر سنڈی ہائیڈ اسمتھ کو شکست دی۔ انتخابی نتائج میں کولم کو 49.2 فیصد ووٹ ملے، جبکہ ان کی حریف 48.7 فیصد ووٹ حاصل کرسکیں۔ آزاد امیدوار ٹائی پنکنز نے 2.1 فیصد ووٹ حاصل کیے۔

یہ کامیابی اس لیے بھی اہم ہے کہ مسیسیپی میں گزشتہ تقریباً چار دہائیوں سے امریکی سینیٹ کے انتخابات میں ری پبلکن امیدوار کامیاب ہوتے رہے ہیں۔ امریکی صدر ڈونلڈ ٹرمپ نے بھی 2024 کے صدارتی انتخاب میں اس ریاست سے تقریباً 23 فیصد ووٹوں کے فرق سے کامیابی حاصل کی تھی۔

شکست کے بعد سنڈی ہائیڈ اسمتھ نے اپنے ویڈیو پیغام میں اسکاٹ کولم کو کامیابی پر مبارک باد دی اور کہا کہ اگرچہ انتخابی نتیجہ ان کی توقعات کے مطابق نہیں آیا، تاہم وہ عوام کے فیصلے کا احترام کرتی ہیں۔

ریاستی دارالحکومت جیکسن میں انسانی حقوق کی تنظیم این اے اے سی پی کے دفتر میں کولم کی کامیابی کا اعلان ہونے پر کارکنوں نے جشن منایا۔ تنظیم کے چیئرمین لیون رسل نے اس کامیابی کو تاریخی قرار دیتے ہوئے کہا کہ سیاہ فام برادری کی منظم انتخابی جدوجہد نے اس نتیجے میں اہم کردار ادا کیا۔

مقامی پراسیکیوٹر اسکاٹ کولم نے اپنی انتخابی مہم میں مہنگائی اور عوام کو درپیش معاشی مشکلات کو بنیادی موضوع بنایا تھا۔ انہوں نے اپنی حریف کو صدر ٹرمپ کی تجارتی پالیسیوں کی حمایت پر تنقید کا نشانہ بناتے ہوئے انہیں طنزیہ طور پر ’’سنڈی ہائی پرائسز‘‘ کا نام دیا۔

رپورٹس کے مطابق ٹرمپ انتظامیہ کی درآمدی محصولات سے متعلق پالیسیوں اور ایران جنگ کے معاشی اثرات پر عوامی تشویش بھی انتخابی مہم میں اہم موضوعات رہے۔

اسکاٹ کولم کی کامیابی کو امریکی وسط مدتی انتخابات میں ڈیموکریٹ جماعت کے لیے اہم پیش رفت قرار دیا جا رہا ہے۔ اس نتیجے نے مسیسیپی جیسی روایتی ری پبلکن اکثریتی ریاست میں سیاسی تبدیلی کی نئی مثال قائم کردی ہے۔