لاہور ہائیکورٹ نے 2 سالہ بچی کی ہلاکت کے مقدمے میں ملزم کو بری کر دیا

لاہور ہائیکورٹ نے 2 سالہ بچی کی ہلاکت کے مقدمے میں مرکزی ملزم شاہ نواز کی جیل اپیل منظور کرتے ہوئے اس کی سزا کالعدم قرار دے دی اور اسے فوری رہا کرنے کا حکم جاری کر دیا۔ عدالت عالیہ کے جسٹس طارق سلیم شیخ نے 14 صفحات پر مشتمل تحریری فیصلہ جاری کیا، جس میں قرار دیا گیا کہ استغاثہ ملزم کے خلاف جرم ثابت کرنے میں مکمل طور پر ناکام رہا ہے۔

عدالتی دستاویز کے مطابق ٹرائل کورٹ نے ملزم شاہ نواز کو 20 لاکھ 55 ہزار روپے دیت ادا کرنے کی سزا سنائی تھی جسے بعد ازاں سیشن کورٹ نے بھی برقرار رکھا تھا، تاہم لاہور ہائیکورٹ نے دونوں ماتحت عدالتوں کے فیصلے کالعدم قرار دے دیے۔ فیصلے میں کہا گیا ہے کہ مدعیہ سکینہ بی بی نے دورانِ جرح یہ بات تسلیم کی کہ اس نے خود حادثہ ہوتے نہیں دیکھا تھا جبکہ بچی کے والد کے بیان میں بھی بعد ازاں تضاد اور بہتری سامنے آئی جو کہ دفعہ 161 ضابطہ فوجداری کے تحت درج ابتدائی بیان سے مختلف تھا۔

عدالت نے اپنے تحریری فیصلے میں اس امر پر بھی شدید تشویش کا اظہار کیا کہ بچی کی والدہ کلثوم بی بی کو بطور گواہ عدالت میں پیش نہیں کیا گیا، جس سے استغاثہ کے خلاف منفی قیاس آرائی پیدا ہوتی ہے۔ ریکارڈ کے مطابق مقدمے کے اندراج میں تقریباً 6 ماہ اور 26 دن کی غیر معمولی تاخیر کی گئی جس کی کوئی معقول اور تسلی بخش وجہ بیان نہیں کی جا سکی۔ تفتیشی افسر نے بھی اپنے اعتراف میں واضح کیا کہ کسی ڈرائیور نے جان بوجھ کر ٹریکٹر بچی پر نہیں چڑھایا تھا۔

عدالتی مشاہدات کے مطابق مبینہ طور پر برآمد کیا گیا ٹریکٹر نہ تو عدالت میں پیش کیا گیا اور نہ ہی کوئی ایسی فرانزک شہادت یا ثبوت سامنے لایا گیا جو اس گاڑی کو وقوعہ سے منسلک کر سکے۔ مزید برآں، قبر کشائی کے دوران ملنے والے ڈھانچے کی شناخت بھی قابلِ اعتماد شواہد سے ثابت نہیں ہو سکی۔ لیڈی ڈاکٹر نے اپنے بیان میں اعتراف کیا کہ وہ اس امر کا یقین سے دعویٰ نہیں کر سکتیں کہ برآمد ہونے والا ڈھانچہ متاثرہ بچی کا ہی تھا، جبکہ شناخت کے لیے ڈی این اے ٹیسٹ یا ایکسرے بھی نہیں کرائے گئے اور نہ ہی ہڈیوں کے فریکچر کی کوئی تصدیق ہوسکی۔

تحریری فیصلے میں مزید بتایا گیا کہ پنجاب فرانزک سائنس ایجنسی کی رپورٹ سے نہ تو ڈھانچے کی شناخت کی تصدیق ہو سکی اور نہ ہی موت کی اصل وجہ کا تعین ممکن ہو سکا۔ عدالت نے شواہد کی تحویل اور منتقلی کے ریکارڈ یعنی چین آف کسٹڈی میں پائی جانے والی خامیوں کو بھی نمایاں کیا۔ لاہور ہائیکورٹ نے اس کیس میں قبر کشائی کے عمل کے حوالے سے اہم رہنما اصول بھی جاری کیے ہیں اور ملزم کی رہائی کو اس امر سے مشروط کیا ہے کہ وہ کسی دوسرے مقدمے میں مطلوب نہ ہو۔