نیوزی لینڈ کے ہاتھوں بھارت کو 244 رنز کی بڑی شکست،پوری ٹیم 89 پر ڈھیر

ماؤنٹ مونگانوئی میں کھیلے گئے ڈے اینڈ نائٹ مقابلے میں نیوزی لینڈ نے پہلے بیٹنگ کرتے ہوئے مقررہ 50 اوورز میں 333 رنز بنائے۔ میزبان ٹیم کی اننگز کا نمایاں ترین پہلو ول ینگ کی شاندار سنچری تھی، جنہوں نے 108 گیندوں پر 125 رنز کی اننگز کھیلی۔ ان کی بیٹنگ میں 14 چوکے اور 4 چھکے شامل تھے۔

ٹم سیفرٹ نے بھی جارحانہ انداز اپناتے ہوئے 48 گیندوں پر 58 رنز بنائے، جبکہ فن ایلن نے 30 گیندوں پر 41 رنز کی اننگز کھیلی۔ ان کے علاوہ مچل سینٹنر نے 24، کرسچن کلارک نے 22 اور کائل جیمیسن نے ناقابلِ شکست 19 رنز بنائے۔ نیوزی لینڈ کی ٹیم نے مقررہ 50 اوورز میں 333 رنز مکمل کیے۔

بھارت کی جانب سے اکشر پٹیل نے 10 اوورز میں 39 رنز دے کر 2 وکٹیں حاصل کیں۔ گرنور برار اور عاقب نبی نے بھی دو، دو کھلاڑیوں کو آؤٹ کیا، جبکہ ارشدیپ سنگھ اور نمن دھیر کے حصے میں ایک، ایک وکٹ آئی۔ کلدیپ یادیو 8 اوورز میں 73 رنز دے کر کوئی وکٹ حاصل نہ کر سکے۔

334 رنز کے ہدف کے تعاقب میں بھارتی ٹیم کا آغاز انتہائی مایوس کن رہا۔ میٹ ہنری نے اننگز کے پہلے ہی اوور میں روہت شرما کو صفر پر آؤٹ کیا، جبکہ اسی اوور میں ویرات کوہلی بھی بغیر کوئی رن بنائے پویلین واپس چلے گئے۔ شریاس آئر بھی اگلے ہی گیند پر کھاتہ کھولے بغیر آؤٹ ہوگئے۔

ابتدائی تین وکٹیں صفر کے مجموعی اسکور پر گرنے کے بعد بھارتی بیٹنگ سنبھل نہ سکی۔ روتوراج گائیکواڑ 5 رنز بنا کر آؤٹ ہوئے، جبکہ وکٹ کیپر بلے باز ایشان کشن نے سب سے زیادہ 27 رنز بنائے۔ اکشر پٹیل نے 21 اور نمن دھیر نے بھی 21 رنز اسکور کیے، تاہم کوئی بھی بلے باز بڑی اننگز کھیلنے میں کامیاب نہ ہو سکا۔

نیوزی لینڈ کے میٹ ہنری نے 9.4 اوورز میں صرف 27 رنز دے کر 6 بھارتی کھلاڑیوں کو پویلین بھیجا۔ میتھیو فشر نے 31 رنز کے عوض 3 وکٹیں حاصل کیں، جبکہ کائل جیمیسن نے ایک کھلاڑی کو آؤٹ کیا۔

بھارت کی پوری ٹیم 26.4 اوورز میں 89 رنز بنا کر آؤٹ ہوگئی اور نیوزی لینڈ نے یہ مقابلہ 244 رنز کے بڑے فرق سے جیت لیا۔ میٹ ہنری کو شاندار بولنگ پر پلیئر آف دی میچ قرار دیا گیا۔