متحدہ عرب امارات کا عید الاتحاد 2026 پر تین روزہ سرکاری تعطیلات کا اعلان

ابوظہبی: متحدہ عرب امارات کی حکومت نے ملک کے 55ویں عید الاتحاد کے موقع پر وفاقی سرکاری ملازمین کے لیے تین روزہ سرکاری تعطیلات کا اعلان کر دیا ہے، جس کے نتیجے میں ہفتہ وار تعطیلات کو ملا کر ملازمین کو مسلسل پانچ روز کی چھٹیاں ملیں گی۔

متحدہ عرب امارات کے گورنمنٹ میڈیا آفس کے اعلان کے مطابق سرکاری تعطیلات بدھ 2 دسمبر سے جمعہ 4 دسمبر 2026 تک ہوں گی۔

وفاقی حکومت کے ملازمین معمول کے ہفتہ اور اتوار کے ویک اینڈ کے بعد پیر 7 دسمبر 2026 کو دوبارہ اپنے فرائض انجام دینا شروع کریں گے۔

یہ پانچ روزہ تعطیلات ملک بھر میں متحدہ عرب امارات کے قیام کی 55ویں سالگرہ کی تقریبات کے موقع پر ہوں گی۔ متحدہ عرب امارات 2 دسمبر 1971 کو قائم ہوا تھا۔

عید الاتحاد کی اہمیت

عید الاتحاد ہر سال 2 دسمبر کو منائی جاتی ہے، جو 1971 میں متحدہ عرب امارات کے قیام کی یاد دلاتی ہے۔ اس روز چھ امارات نے متحد ہو کر ایک ملک کی بنیاد رکھی تھی، جبکہ رأس الخیمہ 1972 میں اس اتحاد میں شامل ہوا تھا۔

یہ دن متحدہ عرب امارات کے اتحاد، قومی شناخت اور کامیابیوں کو اجاگر کرنے کے ساتھ ساتھ بانی رہنماؤں، بالخصوص مرحوم شیخ زاید بن سلطان النہیان کے وژن کو خراجِ تحسین پیش کرنے کے لیے منایا جاتا ہے۔

تقریبات میں خاندانوں کو مرکزی اہمیت

متحدہ عرب امارات نے اس سے قبل 55ویں عید الاتحاد کی بصری شناخت بھی متعارف کرائی تھی، جس کے ساتھ 2 دسمبر کو قومی دن کی تقریبات کی تیاریاں اور الٹی گنتی شروع ہو گئی تھی۔

اس سال عید الاتحاد کی تقریبات متحدہ عرب امارات کے ’’سالِ خاندان‘‘ کے دوران منعقد ہوں گی، جن میں ان خاندانوں، نسلوں اور کمیونٹیز کو مرکزی اہمیت دی جائے گی جنہوں نے گزشتہ 55 برسوں کے دوران ملک کی تشکیل میں کردار ادا کیا۔

اس سال کی تھیم متحدہ عرب امارات کو ’’خاندانوں کا خاندان‘‘ قرار دیتی ہے، جہاں مختلف پس منظر سے تعلق رکھنے والے افراد مشترکہ اقدار، تجربات اور احساسِ وابستگی کے ذریعے ایک دوسرے سے جڑے ہوئے ہیں۔

تقریبات کی تیاریاں شروع ہونے کے ساتھ متحدہ عرب امارات بھر کے خاندانوں اور کمیونٹیز کو اپنی تقریبات کی تیاری اور اس قومی موقع میں شرکت کی ترغیب دی جا رہی ہے۔