وزیراعظم کا ذیابیطس کی روک تھام کے لیے 6.8 ارب روپے کے فنڈز کا اعلان

اسلام آباد (نیوز ڈیسک) وزیراعظم نے ذیابیطس کے عالمی دن کے موقع پر اپنے پیغام میں کہا ہے کہ ذیابیطس کا تیزی سے پھیلاؤ صحتِ عامہ کا سنگین مسئلہ بنتا جا رہا ہے۔ پاکستان اس دن کے موقع پر عالمی برادری کے ساتھ مل کر ذیابیطس کی روک تھام کے لیے مؤثر اقدامات اور باہمی تعاون کی اہمیت پر زور دیتا ہے۔ اس سال ذیابیطس کا عالمی دن ذیابیطس کے خلاف بروقت اقدامات کے عنوان سے منایا جا رہا ہے، جو بیماری کی پیچیدگیوں سے بچاؤ کے لیے بروقت اسکریننگ اور طبی علاج کی اہمیت اجاگر کرتا ہے۔

سرکاری اعداد و شمار اور طبی رپورٹس کے مطابق پاکستان میں ذیابیطس کے مریضوں کی تعداد ساڑھے 3 کروڑ سے تجاوز کر چکی ہے، جب کہ ماہرین نے غیر صحت مند طرزِ زندگی کو اس مرض میں اضافے کی بڑی وجہ قرار دیا ہے۔ طبی ماہرین کا کہنا ہے کہ حیدرآباد میں ہر 5 میں سے ایک شخص کو ذیابیطس کا عارضہ لاحق ہے اور ملک بھر میں 18 سال سے اوپر کے عمر کے 33.5 فیصد افراد اس مرض کا شکار ہیں۔ یہ مرض صرف انسولین کے کم بننے تک محدود نہیں بلکہ آنکھوں، گردوں اور دل کی بیماریوں کا بھی سبب بنتا ہے۔

اس صورتحال کے پیشِ نظر وزیراعظم نے ذیابیطس کی روک تھام اور کنٹرول کے لیے وزیراعظم ذیابیطس روک تھام اور کنٹرول پروگرام مرتب کیے جانے کی تصدیق کی ہے، جس کے تحت وفاقی حکومت نے 6.8 ارب روپے مختص کیے ہیں۔ اس پروگرام کا مقصد ابتدائی مرحلے میں ذیابیطس کی تشخیص کے لیے اسکریننگ کا دائرہ وسیع کرنا، بنیادی طبی سہولیات بہتر بنانا اور تشخیص و علاج تک عوام کی رسائی بڑھانا ہے۔

ماہرینِ طب نے شہریوں کو مشورہ دیا ہے کہ وہ صحت مند طرزِ زندگی اپنائیں، کم از کم 30 منٹ تک چلنے کو معمول بنائیں، گھر کا کھانا کھائیں، باہر کے کھانوں سے اجتناب کریں اور باقاعدگی سے طبی معائنے اور اسکریننگ کروائیں۔