پنجاب میں سکیورٹی خدشات کے پیش نظر دفعہ 144 کے نفاذ میں 30 دن کی توسیع
نوٹیفکیشن جاری، جاسوسی آلات پر پابندی، لیپ ٹاپ اور موبائل مستثنیٰ ہوں گے۔
حکومت پنجاب نے صوبے بھر میں امن و امان کی صورتحال کو برقرار رکھنے اور ممکنہ سکیورٹی خطرات سے نمٹنے کے لیے دفعہ 144 کے نفاذ میں 30 روز کی مزید توسیع کر دی ہے۔ اس حوالے سے محکمہ داخلہ پنجاب کی جانب سے باضابطہ نوٹیفکیشن جاری کر دیا گیا ہے۔
محکمہ داخلہ پنجاب کے جاری کردہ نوٹیفکیشن کے مطابق، صوبے بھر میں خفیہ ریکارڈنگ ڈیوائسز اور جاسوسی کے لیے استعمال ہونے والے تمام آلات کے استعمال پر مکمل پابندی عائد کی گئی ہے۔ حکام کا کہنا ہے کہ یہ اقدام غیر قانونی نگرانی اور حساس نوعیت کی معلومات کی غیراعلانیہ ترسیل کو روکنے کے لیے اٹھایا گیا ہے۔
نوٹیفکیشن میں مزید وضاحت کی گئی ہے کہ خفیہ کیمروں والی عینکوں، پین کیمروں اور اسی نوعیت کے دیگر پوشیدہ ریکارڈنگ آلات کے استعمال کے ساتھ ساتھ ان کی خرید و فروخت پر بھی پابندی عائد کی گئی ہے۔ مزید برآں، صوبے بھر میں ایسے جاسوسی آلات فروخت کرنے والی دکانوں اور ان کی آن لائن خرید و فروخت پر بھی سخت پابندی برقرار رہے گی۔
تاہم، انتظامیہ نے عام شہریوں اور کاروباری سرگرمیوں کو سہولت فراہم کرنے کے لیے کچھ آلات کو اس پابندی سے مستثنیٰ بھی قرار دیا ہے۔ نوٹیفکیشن کے مطابق لیپ ٹاپ، ٹیبلٹس، موبائل فونز اور پاکستان ٹیلی کمیونیکیشن اتھارٹی (پی ٹی اے) سے باضابطہ منظور شدہ ٹرمینل آلات اس پابندی سے باہر ہوں گے۔ متعلقہ اداروں کو ہدایت کی گئی ہے کہ اس فیصلے پر سختی سے عمل درآمد یقینی بنایا جائے۔