پاک نیوزی لینڈ ٹیسٹ سیریز کل شروع ہوگی،سرفراز جیت کیلئےپرامید

پاکستان اور نیوزی لینڈ کے درمیان تین میچز پر مشتمل ٹیسٹ سیریز کل سے متحدہ عرب امارات میں شروع ہونے جا رہی ہے،قومی ٹیم کے کپتان نے کہا کہ ٹیسٹ سیریز میں سخت محنت کرنا ہوگی۔
جبکہ کیوی کپتان کین ولیمسن کا کہنا تھا کہ اُن کی ٹیم نے چار سال پہلے امارات میں اچھی کرکٹ کھیلی تھی، ابھی تجربے کی کمی ہے۔ولیمسن نے کہا کہ پاکستان کے یاسر شاہ اور محمد عباس بہترین بولنگ کر رہے ہیں، ٹیسٹ سیریز میں اچھے میچز ہوں گے۔
ابوظہبی کے شیخ زید اسٹیڈیم میں دونوں ٹیمیں پہلے ٹیسٹ میں پاکستانی وقت کے مطابق دن 11 بجے مدمقابل ہوں گی۔
نیوزی لینڈ کے خلاف قومی ٹیسٹ اسکواڈ کی قیادت سرفراز احمد کریں گے جب کہ دیگر کھلاڑیوں میں امام الحق، محمد حفیظ، بابر اعظم، اسد شفیق، اظہر علی، حارث سہیل، آصف علی، فہیم اشرف، حسن علی، محمد عباس، شاہین شاہ آفریدی، یاسر شاہ اور میر حمزہ شامل ہیں۔