پی ٹی آئی نے چمکتا دمکتا کراچی مہم کا آغاز کردیا

کراچی: پاکستان تحریک انصاف نئے سال کے آغاز پر نئی حکمت عملی کا آغاز کرتے ہوئے چمکتا دمکتا کراچی مہم کا افتتاح کردیاہے۔
اس موقع پر پاکستان تحریک انصاف کے رہنما خرم شیر زمان کا کہنا تھا کہ تحریک انصاف نے چمکتا دمکتا کراچی مہم کا افتتاح کر دیا ہے، مہم کے تحت کراچی میں زبردست پراجیکٹ لانچ کر رہے ہیں۔ صفائی کی مہم لانچ کر دی ہے، ہر یو سی میں صفائی کریں گے۔
خرم شیر زمان کا کہنا تھا کہ کراچی میں 300 آر او پلانٹ لائیں گے، ایم پی اے شام 5 سے 8 بجے تک انصاف ہاؤس میں بیٹھیں گے۔
انہوں نے کہا کہ سندھ حکومت ہر شعبے میں ناکام ہو چکی ہے، نالائقوں کے سردار کے بار ے میں بہت چرچے ہو رہے ہیں۔ وزیر اعلیٰ اور وزیر بلدیات پانی، صفائی اور پارکس کے مسائل پر ناکام ہیں۔