پولیس اہلکار سمیت متحدہ لندن کے 3 کارندے گرفتار

کراچی میں سی ٹی ڈی آپریشن ون نے شاہ فیصل کالونی میں کارروائی کرتے ہوئے متحدہ لندن کے 3 مبینہ کارندوں کو گرفتار کرلیا۔ جن میں ایک پولیس اہلکار بھی شامل ہے۔

پولیس کا کہنا ہے کہ گرفتار ملزمان نے دوران تفتیش 10 افراد کے قتل کا اعتراف کیا ہے۔

کائونٹر ٹیررازم ڈپارٹمنٹ (سی ٹی ڈی) آپریشن ون نے شاہ فیصل کالونی میں کارروائی کرتے ہوئے متحدہ لندن کے تین کارندوں رضا ہارون۔شیخ جاوید بنگالی اور ظفر سپاری کو گرفتار کرلیا۔

سی ٹی ڈی پولیس کا کہنا ہے کہ گرفتار ملزمان کا تعلق متحدہ لندن کے شاہ فیصل سیکٹر یونٹ 105 سے ہے جبکہ گرفتار ملزمان میں ایک پولیس اہلکار بھی ہے۔ سی ٹی ڈی حکام کا کہنا ہے کہ ملزمان کا گروہ ٹارچر سیل چلانے سمیت جلائو گھیرائو اور بھتے کی متعدد وارداتوں میں ملوث ہیں۔

ملزمان نے دوران تفتیش مخالف سیاسی اور مذہبی جماعتوں کے دس کارکنان کے قتل کا اعتراف کیا ہے۔ سی ٹی ڈی حکام کا کہنا ہے کہ ملزمان نے قتل کی وارداتیں شاہ فیصل اور کورنگی صنعتی ایریا کے علاقوں میں کی ہیں۔

سی ٹی ڈی حکام کے مطابق گرفتار پولیس اہلکار ملزم رضا ہارون کے خلاف محکمہ جاتی کارروائی کا آغاز کرتے ہوئے ملزمان سے مزید تفتیش شروع کردی ہے۔