نوازشریف کےگردوں کامرض اسٹیج تھری تک پہنچ چکاہے،مریم

لاہور : مسلم لیگ ن کی رہنما اور سابق وزیراعظم نواز شریف کی صاحبزادی مریم نواز نے اپنے والد نواز شریف سے کوٹ لکھپت جیل میں ملاقات کے بعدسماجی رابطوں کی ویب سائٹ ٹوئٹر پر ایک پیغام جاری کیا ہے جس میں انہوں نے کہاکہ آج جیل میں نوازشریف سےملاقات ہوئی، نوازشریف کےگردوں کامرض مزیدبڑھ گیاہے،

انہوں نے کہاکہ نوازشریف کےگردوں کا مرض اسٹیج تھری تک پہنچ چکا ہے اور بازو میں بھی بدستور تکلیف ہے۔

رہنما ن لیگ نے کہا کہ نواز شریف کے جیل میں طبی معائنہ کے لیے حکام آج اسپیشلسٹ کا انتظام کر رہے ہیں، طبی معائنہ کے دوران نواز شریف کے ذاتی معالج کی موجودگی اہم ہے۔

انہوں نے کہا کہ محکمہ داخلہ پنجاب کو اس کے لیے تحریری درخواست بھجوا دی گئی ہے۔

خیال رہےکہ اس سے قبل مریم نواز نے اپنے والد سے ملاقات کیلئے حکومت سے اجازت مانگی تھی اور حکومت کی جانب سے انہیں والد سے ملاقات کی اجازت دینے پر حکومت کا شکریہ ادا کیا تھا۔اپنے ایک ٹویٹ میں انہوں نے بتایا کہ انہیں نواز شریف سے ملاقات کی اجازت دے دی گئی ہے جس پر وہ حکومت کی شکر گزار ہیں۔