پشاور میں تیز آندھی اور بارش سے6افراد جاں بحق،50 سے زائد زخمی

 نجی ٹی وی کے مطابق منگل کو پشاور اور گردو نواح میں تیز آندھی اور بارش کے سبب ہونے والے حادثات میں 6 افراد جاں بحق اور 50 کے قریب زخمی ہوگئے۔ 17 زخمیوں کو کے ٹی ایچ، 13 کو ایل آر ایچ اور 12 زخمیوں کو ایچ ایم سی منتقل کیا گیا۔ جاں بحق ہونے والوں میں 10 سال ابراہیم، 9 سالہ برکت شاہ اور دیگر شامل ہیں۔

تیز ہوا سے بی آر ٹی اسٹیشن کی چھتیں طوفان کا سامنا نہ کرسکیں اور تیز ہوا کے باعث چھتیں اکھڑ گئیں۔ ضلع خیبر کے علاقہ شاکس میں گھر کی دیوار گرنے سے برکت شاہ نامی 9 سالہ بچہ جاں بحق ہوگیا، سر کمر کے علاقہ میں دیوار گرنے سے تین افراد زخمی ہوگئے۔

ڈپٹی کمشنر مسعود اسلم کے مطابق زخمیوں کو سیکیورٹی اہلکاروں نے ریسکیو کر کے جمرود سول ہسپتال منتقل کیا، جاں بحق بچے کے خاندان کے لیے تین لاکھ روپے کا چیک اور زخمیوں کے لیے فی کس ایک لاکھ روپے کے چیک اسسٹنٹ کمشنر کو بھیج دیے ہیں۔

پی ڈی ایم اے نے 6افراد کے جاں بحق ہونے کی تصدیق کی ہے،ایمبولینسز کے ذریعے زخمیوں کو ہسپتال منتقل کیا گیا، پی ڈی ایم اے کا کنٹرول روم 24/7 فعال ہے کسی بھی ناخوشگوار واقعے کی اطلاع دی جاسکتی ہے۔

دریں اثنا پیسکو نے کہا ہے کہ شدید آندھی اور طوفانی بارش کی وجہ سے خیبر پختونخوا میں درختوں کے گرنے، تاروں کے ٹوٹنے اور ٹرانسفرمرز کے شارٹ ہونے کی وجہ سے تقریبا 191 سے زائد فیڈرز متاثر ہوئے تھے، پیسکو نے بارش رکتے ہی بحالی کا کام شروع کردیا ہے۔