عوام بے نامی اثاثے30جون تک ظاہر کریں پھر موقع نہیں ملے گا۔وزیر اعظم

وزیراعظم عمران خان نے قوم کے نام جاری پیغام میں کہا ہے کہ عوام بے نامی اثاثے اوراکاؤنٹ 30جون تک ظاہر کریں پھر موقع نہیں ملے گا۔

وزیراعظم عمران خان نے قوم کے نام جاری 2منٹ 20 سیکنڈ کے ویڈیو پیغام میں کہا کہ بدقسمتی سے پاکستانی سب سے کم ٹیکس اور سب سے زیادہ خیرات دیتے ہیں، ملک کو اوپرلے جانے  کے لیے سب کو ٹیکس دینا چاہیے، ٹیکس نہیں دیں گے تو ہم اوپر نہیں جاسکیں گے۔

انہوں نے کہا کہ ہم سالانہ 4 ہزار ارب روپے کا ٹیکس اکٹھا کرتے ہیں، ٹیکس کا نصف قرضوں کی اقساط کی ادائیگی میں چلا جاتا ہے،باقی کے پیسوں سے ملک کے خرچے پورے نہیں ہوسکتے، قوم میں جذبہ ہو تو سالانہ 10 ہزار ارب ٹیکس اکٹھا کرسکتے ہیں۔

وزیراعظم نے کہا کہ ہمارے پاس وہ معلومات ہیں جو پہلے کسی حکومت کے پاس نہیں تھی، اثاثہ ڈکلیئر کرنے کی اسکیم میں سب شرکت کریں، 30 جون تک اپنے اثاثے اور بے نامی بینک اکاؤنٹس ڈکلیئر کریں، بےنامی اثاثے اور اکاؤنٹ ڈکلیئر کرنے کا موقع پھر نہیں ملے گا

وزیر اعظم نے کہا کہ اسکیم  سے فائدہ اٹھائیں اور اپنے بچوں کا مستقبل ٹھیک کریں، ٹیکس دیکر ہمیں موقع دیں کہ قوم کو اپنے پاؤں پر کھڑا کرسکیں۔

انہوں نے کہا کہ پچھلے 10 سال میں پاکستان کا قرضہ 6 ہزار سے 30 ہزار روپے تک پہنچ چکا ہے، ماضی میں حکمرانوں نے جو قرض لیے اس کی قسط ادا کررہے ہیں۔