کابل میں امریکی سفارتخانے کے قریب بم دھماکا۔ 10 افراد ہلاک،42 زخمی

جمعرات 5 ستمبر 2019, 6:37 شام اہم خبریں, بام دنیا

افغانستان کے دارالحکومت کے سخت سیکیورٹی والے سفارتی علاقے پی ڈی 9 میں کار بم دھماکا ہوا جس کے نتیجے میں 10 افراد ہلاک اور 42 زخمی ہوگئے۔

افغان حکام کے مطابق خودکش حملہ آور نے امریکی سفارت خانے کے قریب بارود سے بھری گاڑی افغان انٹیلی جنس سروس ’نیشنل ڈائریکٹوریٹ آف سیکیورٹی‘ (این ڈی ایس) کی چیک پوسٹ سے ٹکرادی۔

دھماکا اتنا زوردار تھا کہ دور دورتک اس کی آواز سنی گئی، قریبی عمارتوں کے شیشے ٹوٹ گئے اور متعدد گاڑیاں تباہ ہوگئیں۔ لاشوں اور زخمیوں کواسپتال منتقل کیا گیا جہاں متعدد زخمیوں کی حالت تشویش ناک بتائی جاتی ہے جس کے نتیجے میں ہلاکتوں میں اضافے کا خدشہ ہے۔

Suicide attack at the gate of Shashdarak, Kabul pic.twitter.com/onL9QVP81u

— Wais Barakzai (@WaisBarakzai) September 5, 2019

سوشل میڈیا پرزیرگردش اطلاعات کے مطابق اس حملے میں افغان سیاست دان سلیمان لئیق بھی ہلاک ہوگئے۔

طالبان نے حملے کی ذمے داری قبول کرتے ہوئے کہا ہے کہ حملے میں غیرملکی فوج کے قافلے کو نشانہ بنایا گیا جس میں 12غیرملکی اور این ڈی ایس کے 8 اہلکار ہلاک ہوگئے۔