پاکستان کو امریکا طالبان معاہدے کی تقریب میں شرکت کی دعوت

وزیر خارجہ شاہ محمود قریشی کو امریکا طالبان امن معاہدے کی تقریب میں شرکت کی دعوت دیدی گئی۔

دفترخارجہ میں قطری سفیر صقر بن مبارک نے وزیر خارجہ شاہ محمود قریشی سے ملاقات کی اور29 فروری کو دوحہ میں امریکا طالبان امن معاہدے پر دستخط کی تقریب میں شرکت کی خصوصی دعوت دی، قطری سفیر نے وزیر خارجہ شاہ محمود قریشی کو خصوصی دعوت نامہ بھی پیش کیا۔

وزیر خارجہ شاہ محمود قریشی کو دعوت قطری ڈپٹی وزیراعظم اور وزیر خارجہ شیخ محمد بن عبد الرحمن الثانی کی جانب سے دی گئی۔ اس موقع پر شاہ محمود قریشی نے کہا کہ پاکستان، امریکا طالبان معاہدے سے متعلق اعلان کا خیر مقدم کرتا ہے، پاکستان کا ہمیشہ سے موقف رہا ہے کہ افغان تنازع کا کوئی فوجی حل نہیں۔

وزیر خارجہ شاہ محمود قریشی نے کہا کہ افغان مفاہمتی عمل کو آگے بڑہانے میں پاکستان اور قطر کا کلیدی کردار ہے، آ ج دنیا پاکستان کا موقف تسلیم کر رہی ہے، پاکستان پرامید ہے کہ امن معاہدے پر دستخط انٹرا افغان مذاکرات کی طرف لے جائیں گے۔