حکومت تیل کی قیمتوں میں 70 سے 80 روپے کمی کرے۔شہباز شریف

 مسلم لیگ ن کے صدر اور قائد حزب اختلاف شہباز شریف نے کہا ہے کہ کرونا وائرس ٹیسٹ عام افراد کیلے مفت کیے جائیں، شرح سود کو کم کر دیا جائے، (ن) لیگ کی جانب سے 10 ہزار کٹس ڈاکٹرز کو دی جائیں گی، ڈاکٹرز کو سیفٹی کٹس مہیا کی جائیں۔

شہباز شریف نے پریس کانفرنس کرتے ہوئے کہا کرونا کی وبا میں شدت آنے کے بعد نواز شریف نے واپسی کا کہا، نواز شریف نے پیغام دیا وہ پاکستان کیلیے دعا گو ہیں

انہوں نے کہاکہ  ڈاکٹرزنے جان ہتھیلی پر رکھ کر لوگوں کی خدمت کی، پاکستان میں 890 کے قریب کرونا کیسز ہیں، کرونا وائرس جیسے چیلنج کا قوم کو سامنا ہے، یقین ہے حکومت بر وقت اقدامات کرے گی، ایسی بات نہیں کرنی چاہیے جس سے معاشرہ تقسیم ہو۔

شہباز شریف کا کہنا تھا کہ کرونا نے پوری دنیا کو لپیٹ میں لے لیا ہے، موجودہ صورتحال میں سیاست کو نہیں لانا چاہیے، سب نے مطالبہ کیا کہ فی الفورلاک ڈاؤن کی طرف جانا چاہیے، ہمیں اس وقت ایک قوم بن کر کرونا وائرس کا مقابلہ کرنا چاہیے، معیشت کے مسائل کے ساتھ کرونا کا مقابلہ کرنا پڑ رہا ہے، بد قسمتی سے ہماری معیشت کمزور، معاشرے میں تقسیم ہے، ڈینگی کے مقابلے کیلیے ہم نے جرمنی سے سامان منگوایا۔

صدر مسلم لیگ نون نے مزید کہا موجودہ صورتحال میں غریب عوام سخت پریشان ہے، حکومت غریب افراد کی امداد کیلیے پلان لائے، اضافی وینٹی لیٹرز سمیت دیگر طبی آلات کی فوری فراہمی کا اہتمام کیا جائے، حکومت کے اچھے اقدامات کی تعریف، غلطی پر اصلاح کی بات کرنا ہوگی، وائرس کے خاتمے تک دیہاڑی دار افراد کو وظیفہ دیا جائے، حکومت تیل کی قیمتوں میں 70 سے 80 روپے کم کرے۔

شہباز شریف نے کہا کہ ہمیں اپنے پاس موجود وسائل کو استعمال کرنا ہوگا، بینظیر انکم سپورٹ پروگرام کی امدادی رقم میں اضافہ کیا جائے، مجھے یقین ہے انشااللہ ہم اس بحران سے نکل آئیں گے، ای او بی آئی کے فنڈز کو بھی امدادی کاموں میں استعمال کیا جاسکتا ہے۔