حوثیوں باغیوں کے ہوائی اور سمندری حملے ناکام بنانے کا دعویٰ

عرب فوجی اتحاد نے حوثیوں باغیوں کے سعودی عرب پر ہوائی اور سمندری دو حملے ناکام بنادیے۔

غیر ملکی خبر رساں ادارے کے مطابق ایک حملہ سعودی عرب کے شہر ابہا کے ہوائی اڈے پر کیا گیا۔

یمن کے حوثیوں باغیوں نے بارودی مواد سے بھرے ڈرون کے ذریعے ابہا ائیرپورٹ کو نشانہ بنانے کی کوشش کی تاہم عرب فوجی اتحاد نے بروقت کارروائی کرتے ہوئے اس ڈرون کو فضا میں ہی تباہ کردیا۔

مار گرائے جانے والے ڈرون کے کچھ ٹکرے ابہا ائیرپورٹ پر بھی گرے تاہم کوئی جانی اور مالی نقصان نہیں ہوا۔ اس واقعے کے باوجود ہوائی اڈے پر پروازوں کی آمد و رفت متاثر نہ ہوئی اور معمول کے مطابق جاری رہی۔

عرب فوجی اتحاد کے ترجمان کرنل ترکی المالی نے بتایا کہ اتحاد نے حوثی باغیوں کا بارودی کشتی سے کیا جانے والا حملہ بھی ناکام بنادیا۔

کرنل ترکی المالکی نے کہا کہ حوثی باغیوں نے بحیرہ احمر کے جنوب میں ریموٹ سے کنٹرول ہونے والی ڈرون کشتی کے ذریعے حملے کی کوشش کی لیکن فوری کارروائی کرتے ہوئے اسے کشتی کو بھی ہدف تک پہنچنے سے قبل تباہ کردیا گیا۔

ترجمان عرب فوجی اتحاد کے مطابق یہ کشتی علاقائی و بین الاقوامی سلامتی اور بحری جہازوں عالمی تجارت کے لیے بھی خطرہ تھی۔

واضح رہے کہ ایران کے حمایت یافتہ حوثی باغیوں نے یمن کی حکومت پر قبضہ کرلیا ہے اور سعودی عرب کی قیادت میں عرب فوجی اتحاد حوثی باغیوں کے خلاف فوجی آپریشن کررہا ہے۔