قومی ٹیم دورہ نیوزی لینڈ کے لیے روانہ ہوگئی

قومی ٹیم دورہ نیوزی لینڈ کے لیے روانہ ہوگئی.

قومی اسکواڈ لاہور سے غیر ملکی ائیر لائن کی پرواز سے براستہ دبئی نیوزی لینڈ کے لیے روانہ ہوا ہے اور اسکواڈ نیوزی لینڈ کی لنکن یونیورسٹی میں 14 روزکا قرنطینہ کرے گا۔

نیوزی لینڈ روانہ ہونے والے 54 رکنی اسکواڈ میں پاکستان ٹیم اور پاکستان شاہینزکے 34کھلاڑی اور20 آفیشلز شامل ہیں۔

نیوزی لینڈ پہنچے کے بعد پہلے 3 روز اسکواڈ مکمل تنہا رہے گا۔ پہلے کووڈ 19 ٹیسٹنگ کے بعد کھلاڑیوں کو گروپس میں تقسیم کیا جائے گا اورگروپس میں ہی ٹریننگ سمیت دوسری سرگرمیاں جاری رکھیں گے۔

قرنطینہ کے دوران تین کووڈ19 ٹیسٹنگ ہوں گی جبکہ 14 روز کے بعد اسکواڈ کو آزادانہ گھومنے پھرنے کی آزادی حاصل ہو گی۔

پاکستان اور نیوزی لینڈ کے درمیان 3 ٹی ٹوئنٹی اور 2 ٹیسٹ میچز کھیلے جائیں گے۔ پہلا ٹی ٹونٹی میچ 18 دسمبر کو آکلینڈ اور دوسرا 20 دسمبرکو ہیملٹن میں کھیلا جائے گا جب کہ سیریز کا تیسر ا میچ میچ 22 دسمبر کو نیپیئر میں ہوگا۔

پہلا ٹیسٹ میچ 26 دسمبر سے ماؤنٹ ماؤنگنائی میں شروع ہوگا جب کہ دوسرا ٹیسٹ میچ 3 جنوری سے کرائسٹ چرچ میں کھیلا جائے گا۔بابر اعظم پہلی مرتبہ ٹیسٹ کرکٹ میں پاکستان ٹیم کی قیادت کریں گے۔

قومی کرکٹ ٹیم 2 چار روزہ اور 4 ٹی ٹوئنٹی کھیلے گی۔ پاکستان شاہینز اور نیوزی لینڈ اے کے درمیان پہلا 4 روزہ میچ 10 دسمبر سے شروع ہو گا جب کہ دوسرا 4 روزہ میچ 17 سے 20 دسمبر تک واھنگری میں کھیلا جائے گا۔

اوپنر فخر زمان روانگی سے چند گھنٹے قبل بخار میں مبتلا ہونے پردورہ نیوزی لینڈ سے باہر ہوگئے۔