خوشاب میں گاڑی پر فائرنگ سے 4 افراد جاں بحق

خوشاب کے علاقے سندرال روڈ پر نامعلوم افراد نے گاڑی پر فائرنگ کرکے 4 افراد کو قتل کردیا۔

نجی ٹی وی کے مطابق خوشاب سندرال روڈ پر پہلے سے گھات لگائے مسلح افراد نے ایک گاڑی کو نشانہ بنایا ، فائرنگ سے گاڑی میں سوار4 افراد موقع پر ہی دم توڑگئے، واقعے کے فوری بعد مسلح افراد فرار ہونے میں کامیاب ہوگئے۔ لاشوں کو ضابطے کی کارروائی کے لیے قریبی اسپتال منتقل کردیا گیا۔

پولیس ذرائع کا کہنا ہے کہ جاں بحق افراد پیشی کے لیے کچہری آرہے تھے۔ ابتدائی تحقیقات میں پتہ چلا ہے کہ فائرنگ کا واقعہ پرانی دشمنی کا شاخسانہ ہے اور ڈھاک برادری کے لوگوں نے راجا برادری کے افراد کو نشانہ بنایا ہے۔

ریجنل پولیس آفیسر سرگودھا ریجن اشفاق خان نے واقعے کا نوٹس لیتے ہوئے ڈی پی او خوشاب کو ملزمان کی فوری گرفتاری اور انہیں قانون کے کٹہرے میں لانے کی ہدایت کی۔