گوشوارے جمع نہ کرانے پر150 ارکان پارلیمان کی رکنیت معطل

اسلام آباد:الیکشن کمیشن نے مالی گوشواروں کی تفصیلات جمع نہ کرانے پر150 اراکین پارلیمنٹ اور صوبائی اسمبلی کی رکنیت معطل کردی۔

تفصیلات کے مطابق مالی گوشواروں کی تفصیلات جمع نہ کرانے پر الیکشن کمیشن نے 150 اراکین پارلیمنٹ اور صوبائی اسمبلی کی رکنیت معطل کر دی ہے، جن میں 3 سینیٹرز، 36 اراکین قومی اسمبلی، 69 اراکین پنجاب اسمبلی، 14 اراکین سندھ اسمبلی،21 خیبرپختون اسمبلی اور بلوچستان اسمبلی کے 7 اراکین شامل ہیں۔

الیکشن کمیشن کے مطابق جن اراکین کی رکنیت معطل کی گئی ہے ان میں مسلم لیگ ن کے مصدق ملک سمیت 3 سینیٹرز، وفاقی وزرا فواد چوہدری، نورالحق قادری، حماد اظہر، شفقت محمود، وفاقی وزیر ڈاکٹر فہمیدہ مرزا، وزرا مملکت فرخ حبیب اورشبیرعلی قریشی شامل ہیں۔

الیکشن کمیشن نے جن اراکین کی رکنیت معطل کی ان میں سابق وزیراعظم راجا پرویز اشرف، وزیراعلیٰ سندھ مراد علی شاہ ، ڈاکٹر عامر لیاقت حسین، فردوس شمیم نقوی، علی گوہر خان، صداقت عباسی، راجا ریاض، خالد مقبول صدیقی، یار محمد رند، میر سکندرعلی، سرداراویس احمد خان لغاری، سمیع اللہ چوہدری، سلمان نعیم اور سبطین خان نیازی بھی شامل ہیں۔

الیکشن کمیشن کا کہنا ہے کہ رکنیت معطل ہونے والے اراکین اسمبلی کاروائی اورقانون سازی میں حصہ نہیں لے سکیں گے۔