’’آپ آئیں یا نہ آئیں-پاکستان نہیں جائیں گے-‘‘ہربھجن کا’’تازہ بھجن‘‘

نئی دہلی(امت نیوز) بھارتی کرکٹ ٹیم کے سابق آف اسپنر ہربھجن سنگھ نے ایک بار پھر پاکستان کرکٹ ٹیم اور پی سی بی کے خلاف ہرزہ سرائی کی ہے۔
ایک ٹاک شو میں گفتگو کرتے ہوئے انہوں نے کہا کہ پاکستان میں سیکیورٹی ایشوز ہیں اس لیے بی سی سی آئی ٹیم نہیں بھیجنا چاہتا۔
ہربھجن سنگھ نے کہا کہ پاکستان کرکٹ بورڈ (پی سی بی) کے چیئرمین رمیز راجہ نے ایک بیان میں کہا تھا کہ ہمارے پاس پیسہ نہیں ہے، ہمیں اپنی کرکٹ چلانے کے لیے بھارتی بورڈ کی طرف دیکھنا پڑتا ہے۔
اگر ایشیا کپ میں بھارت پاکستان نہیں جاتا تو یہ ہمارا فیصلہ ہے، آپ بھی ورلڈ کپ کھیلنے نہ آٓئیں، کس نے کہا ہے آپ کو کہ ضرور آئیں۔
ہربھجن سنگھ نے کہا کہ بھارت کو پاکستان سے کھیلنے کا کوئی شوق نہیں، البتہ پاکستان کو بھارت کی ضرورت ہے۔
آئی سی سی چیمپیئنز ٹرافی میں بھارتی ٹیم کے آنے سے متعلق سوال پر ہربھجن سنگھ نے پہلے تو ہامی بھری لیکن بعد میں کہا کہ ایسا نہیں ہوگا۔