مریم نواز کی طلبی کے باوجود گوجرانوالہ سیشن کورٹ میں عدم پیشی

گوجرانوالہ(امت نیوز)سیشن کورٹ گوجرانوالہ میں طلبی کے باوجود مریم نواز اور جلسہ آرگنائزرز میں سے کوئی بھی پیش نہیں ہوا۔جس پر عدالت نے انہیں 14 مارچ کو دوبارہ طلبی کے نوٹس جاری  کردیے۔

مریم نواز اور جلسہ آرگنائزرز  پر غلام حسین پارک میں جلسے کیلئے درخت کاٹنے اور جھولے چوری کرنے کا الزام ہے۔

کیس کی سماعت ایڈیشنل سیشن جج کی عدالت میں ہوئی ۔ رٹ پٹیشنر رہنما جماعت اسلامی فرقان بٹ اپنے وکلا کے ساتھ عدالت میں پیش ہوئے ۔ پولیس نے وقوعہ سے متعلق رپورٹ عدالت میں جمع کرا دی۔

عدالت میں مریم نواز اور ن لیگ جلسہ آرگنائزرز  میں سے کوئی بھی فریق پیش نہیں ہوا ۔

وکیل درخواست گزار نے کہا کہ ملزمان با اثر ہیں، پولیس نے ہمیں بلائے بغیررپورٹ بنا کر جمع کرائی ہے، پولیس کی طرف سے جمع کرائی گئی رپورٹ کی کاپی فراہم کی جائے۔

عدالت نے جواب دیا کہ پولیس رپورٹ کی کاپی کیلئے تحریری درخواست جمع کرائیں۔

خیال رہے کہ  درخواست گزار نے اندراج مقدمہ کیلئے عدالت میں زیر  دفعہ بائیس اے بائیس بی درخواست دائر کر رکھی ہے اور درخواست میں مریم نواز اور ن لیگ کی جلسہ آرگنائزر کمیٹی کو ملزم نامزد کیا گیا ہے۔

درخواست میں الزام ہے کہ غلام حسین پارک سے ن لیگ کے جلسے سے پہلے درخت کاٹے گئے اور جھولے چوری ہوئے۔