یقین تھا بابر اعظم عالمی نمبر ون بنیں گے، مکی آرتھر

لاہور ( اُمت نیوز) قومی کرکٹ ٹیم کے نئے ڈائریکٹر مکی آرتھر نے کہا ہے کہ بابراعظم کو جب پہلی بار سٹروک کھیلتے ہوئے دیکھا تو یقین ہوگیا تھا وہ عالمی نمبر ون بیٹر بنیں گے۔
پریس کانفرنس کرتے ہوئے مکی آرتھر نے کہا کہ ان کو تسلسل کے ساتھ مواقع دینے کی سوچ کے پیچھے میرا یقین تھا کہ وہ پاکستان کیلئے اہم ترین کرکٹر کے طور پر کردار ادا کرسکتے ہیں، وہ مجھے نمبر ون بیٹر کے طور پہچان بنانے کے اہل نظر آئے، سب سے اہم بات یہ ہے کہ بابر ہمیشہ بہتری لانے کی جستجو میں رہتے اور کوشش کرتے ہیں۔
انہوں نے کہاکہ پاکستان کے مزید کئی کرکٹرز میرے کوچنگ چھوڑنے کے بعد بھی رابطے میں رہے، اسی لیے کہتا ہوں کہ اس ملک سے میرا رشتہ کبھی نہیں ٹوٹا۔
ایک سوال پر مکی آرتھر نے کہا کہ زبان کی وجہ سے پاکستانی کرکٹرز کے ساتھ رابطوں میں کبھی مشکل پیش نہیں آئی، کرکٹ کی ایک اپنی بھی عالمی زبان ہے، کچھ باتیں تو ہم بھی اردو اور یہاں تک کہ پشتو میں بھی سمجھانے میں کامیاب ہوجاتے ہیں جبکہ چند امور میں تو اپنی بات پہنچانے کیلئے اشارے بھی کافی ہوتے ہیں۔