خواجہ آصف نے مذاکرات وقت کا ضیاع قرار دیدیا

اسلام آباد: وزیردفاع خواجہ آصف کا کہنا ہے کہ مذاکرات نہیں ہونے چاہیے یہ وقت کا ضیاع ہے اور بحران جیسی کوئی صورتحال نہیں۔

صحافیوں سے غیر رسمی بات کرتے ہوئے ایک سوال کے جواب میں وزیردفاع خواجہ آصف کا کہنا تھا کہ حکومتی اراکین کہتے ہیں عمران خان سے مذاکرات نہیں ہوسکتے، میں بھی یہی کہہ رہا ہوں مذاکرات نہیں ہونے چاہیے، یہ وقت کا ضیاع ہے۔

خواجہ آصف کا کہنا تھا کہ پیشگی شرائط کے ساتھ مذاکرات نہیں شروع ہوتے، اگر شرائط پہلے رکھ دیں پھر تو مذاکرات کا فائدہ نہیں، سنا ہے کہ عمران خان نے اس قسم کی باتیں کی ہوئی ہیں، پھر ہمیں کوئی شوق نہیں ہے اس سے بات کرنے کا، مولانا فضل الرحمان پہلے ہی کہہ چکے پی ٹی آئی سے بات نہ کریں۔

وزیردفاع نے مزید کہا کہ بحران جیسی کوئی صورتحال نہیں ہے، ہم نے کہہ دیا ہے ہمارے پاس پیسے نہیں ہیں، علیحدہ علیحدہ انتخابات سے وفاق کو بہت نقصان پہنچے گا، دیگرصوبوں میں پنجاب کے خلاف نفرت اور بڑھے گی۔