مفت آٹااسکیم میں 20ارب کی کرپشن ہوئی،شاہدخاقان کا انکشاف

لاہور(امت نیوز)سابق وزیراعظم اور مسلم لیگ (ن) کے رہنما شاہد خاقان عباسی نے انکشاف کیا ہے کہ مفت آٹے کی تقسیم میں بیس ارب کی کرپشن ہوئی ۔انہوں نے ملک کے مسائل کی وجہ لیڈر شپ کی ناکامی کو قرار دیا ۔
لاہور میں تقریب سے خطاب میں شاہد خاقان عباسی نے کہا کہ آج ادارے ایک دوسرے کے سامنے صف آراء ہیں، ملک کے مسائل کی وجہ سیاسی قیادت کی ناکامی ہے، مسائل کا حل سب ملکر نہیں کریں گے تو وہ ختم نہیں ہوں گے۔
انھوں نے کہا کہ ایسے افراد کو پارلیمنٹ میں لایا گیا جو اس کے قابل نہیں تھے، پارلیمنٹ میں جانے کے لیے تعلیم یافتہ ہونا ضروری ہے، حکومت اپنی ذمہ داریوں سے غافل ہے جبکہ عدلیہ آئین سے بالا نہیں ان کا کام آئین کی تشریح کرنا ہے نا کہ اس کیخلاف مہم جوئی کرنا۔
رہنما ن لیگ کا کہنا تھا کہ صوبائی اور وفاقی حکومت لوکل گورنمنٹ کے حق میں نہیں ، اگر کوئی یہ کہتا ہے کہ اسے الیکشن جتوا دیں تو ملک کے مسائل حل ہو جائیں گے تو ایسا ممکن نہیں ، آج حالت یہ ہے کہ وفاقی افسر صوبے میں صرف اپنی آسائشوں کے لیے رہتا ہے۔
شاہد خاقان عباسی نے کہا کہ ہمیں حکومت کی ناکامی کی وجہ معلوم کرنا ہوگی، مسائل کے حل آسان نہیں ہوتے، بنیادی چیزوں کو ٹھیک کرنا ہو گا۔
سابق وزیراعظم اور رہنما ن لیگ شاہد خاقان عباسی نے یہ انکشاف بھی کیا کہ مفت آٹے کی تقسیم میں بیس ارب کی کرپشن ہوئی ہے۔