ٹول پلازہ سے کیش لے کر آنے والی وین پر ڈاکوؤں کا حملہ، 3 افراد جاں بحق

وزیرآباد : ٹول پلازہ سے کیش لے کر آنے والی وین پر ڈاکوؤں کی فائرنگ سے 3 افراد جاں بحق ہوگئے۔

وزیرآباد ٹول پلازہ سے کیش لے کر آنے والی وین پر ڈاکوؤں نے حملہ کردیا اور رقم لوٹنے کے لیے فائرنگ کردی، جس کے نتیجے میں 3 افراد موقع پر جاں بحق ہوگئے۔

پولیس حکام کے مطابق واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچ گئیں اور لاشوں کو اسپتال منتقل کردیا۔

حکام نے بتایا کہ ٹول پلازہ سے کیش لے کر آنے والے 2 سیکیورٹی گاڑڈز اور ایک ڈرائیور کو ڈاکوؤں نے قتل کردیا اور 64 لاکھ روپے کیش لوٹ کر فرار ہو گئے۔

دوسری جانب ذرائع کا کہنا ہے کہ پولیس نے 2 افراد کو حراست میں لے لیا ہے، اور انہیں نامعلوم مقام پر منتقل کردیا گیا ہے۔ تاہم پولیس حکام کی جانب سے گرفتاری کی تصدیق نہیں کی گئی۔