قومی اسکواش ہیرو حمزہ خان کی وطن واپسی پر پرتپاک استقبال

اسلام آباد (اُمت نیوز)قومی اسکواش ہیرو حمزہ خان آسٹریلیا سے وطن واپس پہنچ گئے۔ ایئر پورٹ پرحمزہ خان کا پرتپاک استقبال کیا گیا۔
اسلام آباد ایئرپورٹ پر پاکستان اسپورٹس بورڈ اور آرمی اسپورٹس ڈائریکٹوریٹ کے حکام نے حمزہ خان کا ایئر پورٹ پر پُرتپاک استقبال کیا۔
حمزہ خان نے گزشتہ دنوں پاکستان کو 37سال بعد ورلڈ جونیئراسکواش کا ٹائٹل جتوایا ہے۔
حمزہ سے قبل جان شیر خان نے آخری بار 1986میں ورلڈ ٹائٹل پاکستان کیلئے جیتا تھا۔
وفاقی حکومت کی جانب سے ورلڈ جونیئر اسکواش کا ٹائٹل جیتنے پر حمزہ خان کو ایک کروڑ روپے انعام سے نوازا جائے گا۔
ورلڈ جونیئر اسکواش کا ٹائٹل پاکستان کو جتوانے والے حمزہ خان کے اعزاز میں وزیراعظم آفس میں 2 اگست کو خصوصی تقریب منعقد ہوگی۔
تقریب میں وفاقی وزیر بین الصوبائی رابطہ احسان مزاری، پاکستان اسپورٹس بورڈ اور پاکستان اسکواش فیڈریشن کے حکام شرکت کرینگے۔
وزیراعظم شہباز شریف تقریب میں نوجوان اسکواش ہیرو حمزہ خان کی حوصلہ افزائی کرینگے اور شاندار کارکردگی پر کیش ایوارڈ بھی دیں گے۔
23 جولائی کو حمزہ خان نے 37 سال بعد پاکستان کو ورلڈ جونیئر اسکوائش کا ٹائٹل جتوایا تھا۔ آخری بار جان شیر خان نے 1986 میں جونیئر ورلڈ ٹائٹل پاکستان کیلٸے جیتا تھا۔
فائنل میں حمزہ خان نے مصر کے محمد ذکریا کو 1-3 سے شکست دی۔
نوجوان کھلاڑی حمزہ خان نے ایونٹ کے سیمی فائنل میں فرنچ کھلاڑی کو شکست دی تھی۔