نوازشریف کی طبیعت ابھی ٹھیک نہیں، وہ جیل نہیں کاٹ سکتے، پنجاب حکومت

لاہور: مسلم لیگ ن کے قائد اور سابق وزیراعظم نواز شریف کی العزیزیہ ریفرنس میں سزا معطل کرنے کا نوٹیفکیشن جاری کردیاگیا۔

نگران پنجاب کابینہ نے نواز شریف کی العزیزیہ ریفرنس میں سزا معطل کرنے کا تحریری حکم جاری کردیا،تحریری حکم ایڈیشنل چیف سیکرٹری محکمہ داخلہ پنجاب شکیل احمد کی طرف سے جاری کیا گیا،تحریری حکمنامے میں کہا گیا ہے کہ نگران وزیراعلیٰ اور کابینہ ارکان کی منظوری کے بعد نوازشریف کی سزا معطل کی جاتی ہے۔

نوٹیفکیشن کے مطابق نواز شریف نے سزا معطل کرانے کیلیے محکمہ داخلہ پنجاب  کو درخواست دی،نگران وزیراعلیٰ نے درخواست کا جائزہ لینے کیلیے نگران وزرا پر مشتمل ایک کمیٹی تشکیل دی، کمیٹی نے نوازشریف کے وکلا امجد پرویز اور عطا تارڑ کو شنوائی کا موقع دیا،کمیٹی نے نوازشریف کے معالج ڈاکٹر عدنان کو بھی مکمل طور پر سنا۔

تحریری حکم میں کہا گیاہے کہ معالج کے مطابق نوازشریف کی طبیعت ابھی مکمل طور پر ٹھیک نہیں  اور وہ جیل نہیں کاٹ سکتے، اسی معاملے پر صوبائی وزرا، بیوروکریٹس  ، ایڈووکیٹ جنرل پنجاب اور دیگر پر مشتمل کمیٹی نے سفارشات تیار کیں۔

کمیٹی نے ماضی کی مثالوں اور اسلام آباد ہائیکورٹ کے فیصلے کی روشنی میں نوازشریف کی سزا معطل کرنے کی سفارش کی،تحریری حکم میں کہا گیا ہے کہ نگران وزیراعلیٰ محسن نقوی نے کمیٹی ک سفارشات کو منظور کرنے کا حکم جاری کیا ۔