کراچی ، گلستان جوہر میں ایک گھر سے چار افراد کی لاشیں برآمد

کراچی (اُمت نیوز)کراچی کے علاقے گلستان جوہر میں ایک گھر سے چار افراد کی لاشیں برآمد ہوئی ہیں، مقتولین میں ماں، دو بیٹے اور ایک بیٹی شامل ہیں۔

گلستان جوہر بلاک 5 کامران چورنگی کے قریب شیر محمد گوٹھ کے ایک گھر میں قتل کی لرزہ خیز واردات ہوئی جہاں ایک ہی گھر سے ماں اور 3 بچوں کی لاشیں ملیں۔ چاروں کو تیز دھار آلے سے قتل کیا گیا ہے۔

مقتولین کی شناخت 35 سالہ صائمہ، 9 سالہ اشہد، 7 سالہ شاہ زین اور 2 سالہ عمارہ کے نام سے ہوئی۔۔واقعے کے وقت فیملی کا سربراہ گھر پر موجود نہیں تھا۔

اطلاع ملنے پر امدادی ٹیمیں جائے وقوع پر پہنچی اور لاشوں کو اسپتال منتقل کیا۔

بچوں کے چچا کا کہنا ہے کہ بھائی کسی کام سے باہر گیا تھا، رات دو بجے واپس گھر آیا تو بیوی اور بچوں کی لاشیں دیکھیں۔

پولیس نے واقعے کی تحقیقات کا آغاز کردیا ہے۔