بلا چھننے پر شیر افضل مروت کا پشار ہائیکورٹ کے جج پر بڑا الزام

پشاور(اُمت نیوز)پاکستان تحریک انصاف کے سینئر نائب صدر شیر افضل مروت کا کہنا ہے کہ کاغذات نامزدگی مسترد ہونا مضحکہ خیز ہے، سپریم کورٹ کا آرڈر ہے کسی ایف آئی آر کی بنیاد پر کاغذات مسترد نہیں کئے جا سکتے۔

پشاور ہائیکورٹ میں گفتگو کرتے ہوئے شیر افضل مروت نے کہا کہ میرے کاغذات نامزدگی بھی مسترد کئے گئے ہیں، واٹر سپلائی اسکیم میں جتنے بھی میرے ہم نام ہیں، ان کے کھاتے میرے اوپر ڈالے گئے ہیں، میں نے کبھی واٹر سپلائی اسکیم کے لئے اپلائی ہی نہیں کیا۔

شیرافضل مروت نے کہا کہ کاغذات نامزدگی مسترد کرکے فراڈ کا ارتکاب کیا گیا ہے، میں ڈبلیو ایس ایس پی کے خلاف فوجداری کارروائی کا ارادہ رکھتا ہوں۔

پاکستان تحریک انصاف کے سینئر نائب صدر شیر افضل مروت پشاور ہائیکورٹ پہنچ گئے

کاغذات نامزدگی مسترد ہونا مضحکہ خیز ہے، سپریم کورٹ کا آرڈر ہے کسی ایف آئی آر کی بنیاد پر کاغذات مسترد نہیں کئے جا سکتے، شیرافضل مروت کی گفتگو pic.twitter.com/kYtyLJILcZ

— Kamran Ali (@akamran111) January 4, 2024

سینئیر نائب صدر پی ٹی آئی کا کہنا تھا کہ پی ٹی آئی انٹرا پارٹی کیس میں کل جو آرڈر ہوا ہے اس پر افسوس کا اظہار کرتے ہیں۔

انہوں نے کہا کہ اگر عدالت 9 تاریخ تک کیس ملتوی کرتی تو کوئی مسئلہ نہیں تھا، اس آرڈر سے پی ٹی آئی کے لئے مشکلات کھڑی کی گئی ہیں، اس حکم سے آئین کی بالادستی کو بھی دھچکا لگا، ہماری توقع نہیں تھی کہ ایسا فیصلہ ہوگا۔

شیر افضل مروت نے کہا کہ میں ذاتی طور پر سمجھتا ہو کہ اس آرڈر سے جج صاحب کا تعصب عیاں ہوا ہے، جج صاحب سے ہماری یہ توقع نہیں تھی۔