ورکرز کنونشن، کرسی نہ ملنے پر جیالوں کا پارہ ہائی

لاہور: پاکستان پیپلز پارٹی کے ورکرز کنونشن میں چیئرمین بلاول بھٹو کی آمد سے قبل کرسی نہ ملنے پر جیالےایک دوسرے سے لڑ پڑے۔

کنونشن میں کرسی پر بیٹھنے کے معاملے پر جھگڑا شروع ہوا جس کے بعد جیالوں نے ایک دوسرے پر گھونسوں اور تھپڑوں کی بارش کر دی۔ پولیس نے موقع پر پہنچ کر بیچ بچاؤ کروایا۔

پارٹی کے ڈسٹرکٹ صدر امجد جٹ، اسلم گڑا اور چوہدری ریاض میں جھگڑا ہوا تو دونوں کے حامی ایک دوسرے پر پل پڑے۔بتایا گیا ہے کہ لڑائی کے دوران امجد جٹ کا بھائی امین جٹ زخمی ہو گیا۔

پیپلز پارٹی کی جانب سے این اے 127 میں ورکرز کنونشن منعقد کیا گیا جس سے بلاول بھٹو نے خطاب کیا۔

واضح رہے کہ عام انتخابات 2024 کے سلسلے میں سیاسی جماعتوں کی جانب سے ملک بھر میں ورکرز کنونشن اور دیگر سرگرمیاں منعقد کی جا رہی ہیں۔