پنجاب کابینہ نے بجٹ 24-2023 کی منظوری دے دی

پنجاب میں مفت کتابوں کی فراہمی کے لیے 11 ارب روپے کا تخمینہ لگایا گیا ہے جبکہ سینٹرل بزنس ڈسٹرکٹ کے لئے 12.5 ارب، پی کے ایل آئی انڈوومنٹ فنڈ کے لئے 10ارب اور حفظان صحت کے توسیعی پروگرام کے لیے 11.4 ارب روپے مختص کیے گئے ہیں۔

گندم کے قرضہ کی ادائیگی کے لیے 264 ارب اور زراعت پر سبسڈی کے لیے 25.6 ارب رکھنے کی منظوری دی گئی ہے جبکہ وزیراعلیٰ مریم نواز شریف کے خصوصی اقدامات کے لیے بھی بجٹ مختص کیا گیا ہے۔

اجلاس کے دوران صوبائی کابینہ نے تاریخ کا بہترین رمضان پیکیج پیش کرنے پر وزیر اعلیٰ پنجاب مریم نواز شریف کو خراج تحسین پیش کیا۔

اجلاس کے دوران وزیراعلیٰ پنجاب مریم نواز کا کہنا تھا کہ اگلے سال مستند ڈیٹا کے ساتھ بہتر رمضان پیکیج لائیں گے، صوبہ بھر میں 35 لاکھ سے زائد گھرانوں کو رمضان پیکیج کی ترسیل مکمل ہو چکی ہے، ایک ہفتے تک رمضان پیکیج کی ترسیل کا عمل مکمل کر لیا جائے گا، پیاز اور دیگر اشیا کی قیمتیں تیزی سے نیچے آ رہی ہیں۔

ان کا مزید کہنا تھا کہ پرائس کنٹرول میں بہتری کی وجہ سے اشیا کے بے مثال حد تک نرخ نیچے آ رہے ہیں، چیف سیکریٹری، ان کی ٹیم اور ضلعی انتظامیہ رمضان میں بہتر اقدامات پر شاباش کی مستحق ہے، پوری ٹیم نے رمضان پیکیج اور پرائس کنٹرول کیلیے توقعات سے بڑھ کر کام کیا۔

اس موقع پر سینئر صوبائی وزیر مریم اورنگزیب کا کہنا تھا کہ وزیر اعلیٰ پنجاب کے ویژن کے مطابق رمضان نگہبان پیکیج تاریخی اقدام ہے، رمضان پیکیج کی کامیابی کا کریڈٹ پوری ٹیم کو جاتا ہے۔