سعودی عرب،ڈرائیونگ لائسنس رکھنے والے غیرملکیوں کیلئے بڑی خبر

ریاض(اُمت نیوز) سعودی عرب کے ٹریفک پولیس حکام نے کہا ہے کہ ڈرائیور کے ویزے پر آنے والے غیر ملکی کارکنوں کو اپنے ملک کے ڈرائیونگ لائسنس پر مشروط ڈرائیونگ کرنے کی اجازت ہوگی۔

سعودی ذرائع ابلاغ کی رپورٹ کے مطابق سعودی ٹریفک حکام نے غیر ملکی ڈرائیوروں کی سہولت کیلئے قواعد و ضوابط کا اعلان کیا ہے۔ جس میں کہا گیا ہے کہ وہ تارکین وطن ڈرائیورجو پہلی بار نئے ویزے پر یہاں آتے ہیں انہیں یہاں کے ڈرائیونگ لائسنس کے حصول میں کافی وقت درکار ہوتا ہے۔

اسی صورتحال کے پیش نظر انہیں یہ ہدایات دی جاتی ہے کہ ان کے ملک سے جاری کیا گیا ڈرائیونگ لائسنس کا مملکت میں قابل قبول ہونا ضروری ہے جو یہاں کے ضوابط کے مطابق جاری کرایا گیا ہو۔

ادارہ ٹریفک پولیس کا مزید کہنا تھا کہ غیر ملکی ڈرائیورز کے لیے عارضی طورپر اپنے ملک کے ڈرائیونگ لائسنس کا مصدقہ ترجمہ کرانا ہوگا۔

اپنے ملک کے ڈرائیونگ لائسنس پر غیرملکی کارکن کو مملکت میں 3 ماہ سے زیادہ ڈرائیونگ کرنے کی اجازت نہیں ہوگی، اس دوران انہیں مملکت کا ڈرائیونگ لائسنس لازمی طورپر جاری کرانا ہوگا۔