پاکستان شاہینز کو بنگلہ دیش اے کے ہاتھوں شکست

ڈارون: بنگلہ دیش اے نے پاکستان شاہینز کو دوسرے چار روزہ میچ میں دلچسپ مقابلے کے بعد صرف 5 رنز سے شکست دے دی۔

پاکستان شاہینز کو جیتنے کے لیے 296 رنز کا ہدف ملا لیکن میچ کے آخری دن پوری ٹیم 290 رنز بنا کر آئوٹ ہوگئی، فاسٹ باولرز محمد علی اور خرم شہزاد کی آٹھویں وکٹ کی شراکت نے جیت کی امید پیدا کردی تھی لیکن دونوں کے آئوٹ ہوتے ہی صورتحال بدل گئی اور بنگلہ دیش اے نے آخری تین وکٹیں حاصل کرکے ڈرامائی کامیابی حاصل کرلی۔

پاکستان شاہینز نے اپنی دوسری اننگز 136 رنز 4 کھلاڑی آوٹ پر شروع کی تو اسے جیت کے لئے مزید 160 رنز درکار تھے اور اس کی چھ وکٹیں باقی تھیں۔حسیب اللہ گزشتہ روز کے 44 رنزمیں صرف 7 رنز کا اضافہ کرکے 51 رنز پر آوٹ ہوگئے،طیب طاہر اور عمیر بن یوسف نے چھٹی وکٹ کی شراکت میں65 رنز کا اضافہ کیا لیکن دونوں بیٹرز نصف سنچری بنائے بغیر پویلین چلتے بنے، عمیر بن یوسف نے 4 چوکوں کی مدد سے 45 اور طیب طاہر نے 3 چوکوں کی مدد سے 43 رن بنائے۔

جب پاکستان شاہینز کی ساتویں وکٹ گری تو سکور 230 رنز تھا اس موقع پر محمد علی اور خرم شہزاد نے ذمہ دارانہ بیٹنگ کرتے ہوئے آٹھویں وکٹ کی شراکت میں 57رنز بناڈالے تاہم یہ دونوں یکے بعد دیگرے آوٹ ہوگئے۔

محمد علی نے 4 چوکوں کی مدد سے 21 رنز سکور کئے، خرم شہزاد نے ایک چھکے اور 3 چوکوں کی مدد سے 28 رنز کی اننگز کھیلی ،ان دونوں کو محمود الحسن جوئے نے آو¿ٹ کیا۔آخری کھلاڑی فیصل اکرم کو مراد نے ایک رن پر بولڈ کردیا،محمود الحسن نے عمدہ بولنگ کرتے ہوئے 21 رنز دے کر5 وکٹیں حاصل کیں، رجاالرحمن راجہ نے 3 کھلاڑی آئوٹ کئے۔

یاد رہے کہ پاکستان شاہینز نے بنگلہ دیش اے کو پہلے چار روزہ میچ میں 148 رنز سے شکست دی تھی۔واضح رہے کہ پاکستان شاہینز کی وائٹ بال سائیڈ این ٹی سٹرائیک اور بنگلہ دیش اے کے خلاف 2 ون ڈے میچز 4 اور6 اگست کو کھیلے گی جس کے بعد وہ 9 اگست سے شروع ہونے والی ٹاپ اینڈ ٹی 20 سیریز میں حصہ لے گی۔