اسرائیل میں بس اسٹیشن پر فائرنگ، خاتون ہلاک، 10 افراد زخمی

تل ابیب: اسرائیل میں بس اسٹیشن پر فائرنگ کے واقعے میں ایک خاتون ہلاک اور 10 افراد زخمی ہوگئے۔

اسرائیلی میڈیا کے مطابق فائرنگ کا واقعہ جنوبی شہر بیر شیبہ کے ایک بس اسٹیشن پر پیش آیا، زخمیوں کو اسپتال منتقل کردیا گیا ہے، جس میں سے پانچ کی حالت تشویشناک ہے۔

ریسکیو ذرائع کا کہنا ہے کہ فائرنگ کے واقعے میں زخمی ہونے والے افراد میں سے پانچ افراد معمولی زخمی ہوئے۔اسرائیلی پولیس کے ترجمان نے بتایا کہ حملہ آور کو موقع پر ہی مار دیا گیا ہے۔

عالمی خبر رساں ادارے کے مطابق اسرائیلی پولیس نے دعویٰ کیا ہے کہ مرکزی بس اسٹیشن پر مسافروں پر حملہ کرنے والا نوجوان 29 سالہ ایک بَدو تھا جس کی شناخت احمد العقبی کے نام سے ہوئی ہے۔

اسرائیلی پولیس کا کہنا ہے کہ 29 سالہ احمد العقبی جنوبی اسرائیل کے علاقے لاکیہ قصبے کے قریب واقع بدوؤں کی ایک بستی میں رہتا تھا اور اس کے پاس اسرائیلی شہریت بھی تھی۔

اسرائیلی حکام کا کہنا ہے کہ احمد العقبی مجرمانہ ریکارڈ کا حامل ملزم ہے۔ اس کا تعلق محناد الوکابی سے تھا۔ جس نے اکتوبر 2015 میں اسی بس اسٹیشن پر فائرنگ کرکے ایک فوجی اور ایک اریٹیرین شہری کو ہلاک کر دیا تھا۔

دوسری جانب اسرائیلی وزیر نے وزیراعظم نیتن یاہو سے مطالبہ کیا کہ دہشت گردی میں ملوث شخص کے اہل خانہ کو ملک بدر کردیا جائے۔