یوکرین پر روس کا سب سے بڑا فضائی حملہ، سرکاری دفاتر تباہ

کیف: روس نے یوکرین پر بڑے پیمانے پر فضائی حملہ کیا جس میں 4 افراد ہلاک اور درجنوں زخمی ہو گئے، جبکہ دارالحکومت کیف میں سرکاری دفاتر آگ کی لپیٹ میں آ گئے۔

یوکرینی حکام کے مطابق حملے میں ڈرون اور میزائل استعمال کیے گئے جن سے کئی بلند عمارتیں شدید متاثر ہوئیں۔ یہ پہلا موقع ہے کہ یوکرین کی کابینہ کے دفاتر کو براہِ راست نشانہ بنایا گیا۔

یوکرینی فضائیہ کا کہنا ہے کہ روس نے ایک ہی رات میں 810 ڈرون اور 13 میزائل داغے، جو اب تک کا نیا ریکارڈ ہے۔ ان حملوں میں ایک حاملہ خاتون زخمی ہوئیں جنہوں نے قبل از وقت بچے کو جنم دیا، جبکہ ایک گھڑ سواری کلب میں سات گھوڑے بھی ہلاک ہوئے۔

یوکرینی صدر ولادیمیر زیلنسکی نے کہا کہ یہ کارروائیاں جنگ کو مزید طول دینے کی کوشش ہیں۔ فرانس کے صدر ایمانوئل میکرون اور برطانوی وزیراعظم کیئر اسٹارمر نے حملوں کی شدید مذمت کی، جبکہ یورپی یونین نے کریملن پر سفارت کاری کو ناکام بنانے کا الزام لگایا۔

امریکی صدر ڈونلڈ ٹرمپ نے عندیہ دیا کہ ماسکو پر مزید پابندیاں عائد کی جائیں گی تاکہ روس کو مذاکرات پر مجبور کیا جا سکے۔

اس وقت روس یوکرین کے تقریباً 20 فیصد علاقے پر قابض ہے، جبکہ اس جنگ میں ہزاروں افراد اپنی جانیں گنوا چکے ہیں اور لاکھوں بے گھر ہو گئے ہیں۔