نیپال میں سوشل میڈیا پر پابندی کے خلاف ہنگامے، 19 افراد ہلاک ،کرفیو نافذ

کھٹمنڈو: سوشل میڈیا پر پابندیوں کے خلاف نیپال میں ہزاروں مظاہرین سڑکوں پر نکل آئے، مظاہرین نے پارلیمنٹ کا گھیراؤ کرلیا، پولیس اور مظاہرین کے درمیان جھڑپوں میں 19 افراد ہلاک جبکہ 150 سے زائد زخمی ہوگئے۔۔

حکام نے پارلیمنٹ، صدر کی رہائش گاہ اور وزیر اعظم کے دفتر سنگھ دربار سمیت کئی اہم علاقوں میں کرفیو نافذ کر دیا ہے۔ دیگر اضلاع میں بھی احتجاج کی اطلاعات ہیں۔

زیادہ تر زخمیوں کو نیو بنیشور کے سول ہسپتال منتقل کیا گیا ہے۔ ہسپتال کے ایگزیکٹو ڈائریکٹر موہن چندر رگمے نے کہا کہ کم از کم 2  لوگوں کی موت واقع ہو چکی ہے۔مقامی صحافی نریش گوالی نے فون پر بی بی سی ہندی کو بتایا کہ کم از کم 150 زخمیوں کو مختلف اسپتالوں میں لے جایا گیا ہے۔

ان کا مزید کہنا تھا کہ ’کئی مقامات پر کرفیو نافذ ہے، فوج بھی سڑکوں پر ہے، شدید جھڑپیں ہوئی ہیں، اس کے باوجود مظاہرین پیچھے نہیں ہٹے اور ہلاکتوں کی اطلاعات کے بعد بھی احتجاج جاری ہے۔