فرانس میں بجٹ کٹوتیوں کے خلاف شدید احتجاج، کئی مقامات پر آگ لگادی گئی

فرانس میں بجٹ کٹوتیوں کے خلاف عوامی غصہ شدت اختیار کر گیا۔ تقریباً دو لاکھ افراد نے سڑکوں پر نکل کر صدر ایمانوئل میکرون سے فوری استعفے کا مطالبہ کر دیا۔

ملک کے مختلف شہروں میں مظاہرین نے کچرے کے ڈبوں اور دیگر اشیاء کو آگ لگادی، مغربی شہر رینس میں ایک بس کو نذرِ آتش کر دیا گیا جبکہ پیرس میں ایک عمارت کا حصہ بھی شعلوں کی لپیٹ میں آ گیا۔

احتجاجی مظاہرین نے کئی اہم سڑکیں اور ہائی ویز بلاک کر دیں، جب کہ جنوب مغربی علاقے میں بجلی کی کیبلز کو آگ لگنے سے ٹرین سروس معطل ہو گئی۔

مظاہرین کا کہنا تھا کہ محض چہرے بدلنے سے بات نہیں بنے گی، حکومت کو اپنی پالیسیوں میں بنیادی تبدیلی لانا ہوگی۔

پولیس نے مظاہرین کو منتشر کرنے کے لیے لاٹھی چارج کیا، آنسو گیس کے شیل برسائے اور پانی کی توپوں کا استعمال کیا۔ وزارتِ داخلہ کے مطابق ملک بھر سے تقریباً 500 افراد کو گرفتار کر لیا گیا ہے۔