قطر پر حملہ، کینیڈا کا اسرائیل سے تعلقات پر نظرثانی کا فیصلہ

اوٹاوا: کینیڈا نے قطر پر اسرائیلی حملے کے بعد اسرائیل کے ساتھ اپنے تعلقات کو ازسرنو دیکھنے کا اعلان کیا ہے۔

کینیڈین وزیر خارجہ انیتا آنند کا کہنا ہے کہ قطر پر اسرائیل کا حملہ کسی طور قابل قبول نہیں، خصوصاً اس وقت جب قطر مشرق وسطیٰ میں امن کے فروغ کے لیے کردار ادا کر رہا ہے۔

انہوں نے کہا کہ کینیڈا اسرائیل کے ساتھ تعلقات کا دوبارہ جائزہ لے رہا ہے اور ساتھ ہی اسرائیل پر ممکنہ پابندیوں کے حوالے سے بھی آئندہ اقدامات پر غور کیا جا رہا ہے۔

اس سے پہلے یورپی کمیشن کی صدر ارزولا فان ڈئر لاین بھی اسرائیل پر پابندیاں لگانے اور تعاون محدود کرنے کا اعلان کر چکی ہیں۔

یاد رہے کہ وزیر اعظم مارک کارنی کے اقتدار سنبھالنے کے بعد سے کینیڈا کا اسرائیل کے حوالے سے مؤقف پہلے کے مقابلے میں سخت ہوا ہے۔ جولائی میں کارنی نے اعلان کیا تھا کہ کینیڈا فلسطینی ریاست کو باضابطہ طور پر تسلیم کرے گا، جس پر اسرائیل نے سخت ردعمل دیا تھا۔

مارک کارنی نے حالیہ اسرائیلی فضائی حملے کو "ناقابل برداشت اور تشویشناک” قرار دیتے ہوئے کہا کہ یہ اقدام پورے خطے میں کشیدگی کو بڑھا سکتا ہے۔

اس سے قبل کے وزیر اعظم جسٹن ٹروڈو عمومی طور پر اسرائیل کی حمایت کرتے رہے، تاہم بعض فوجی کارروائیوں پر تنقید بھی کرتے تھے۔