غزہ: صیہونی فضائی کارروائیوں میں 50 سے زائد فلسطینی شہید

غزہ: تازہ اسرائیلی فضائی کارروائیوں میں 50 سے زائد فلسطینی شہید جبکہ 7 افراد بھوک کی شدت سے جان کی بازی ہار گئے۔ شمالی غزہ میں اسرائیلی فضائیہ نے رہائشی عمارتوں پر بمباری کی، جس کے نتیجے میں متاثرہ افراد کو محفوظ مقامات تک پہنچنے کا موقع نہ ملا۔

قطری خبر رساں ادارے کے مطابق اسرائیلی طیاروں نے پناہ گاہوں کو بھی نشانہ بنایا، جہاں ہزاروں خواتین، بچے اور بزرگ مقیم تھے۔ جنوب مغربی غزہ میں پبلک پراسیکیوشن کی عمارت تین فضائی حملوں میں تباہ ہو گئی۔ خان یونس اور وسطی غزہ میں متعدد شہری شہید ہوئے، جن میں بچے بھی شامل ہیں۔

فلسطینی اسپتالوں کے ذرائع نے خبردار کیا ہے کہ شدید بمباری، ادویات اور خوراک کی کمی اور بجلی کی بندش سے طبی نظام مفلوج ہو گیا ہے۔ انسانی حقوق کی تنظیمیں اس صورتحال کو بدترین انسانی بحران قرار دے رہی ہیں۔

فلسطینی میڈیا کے مطابق اسرائیلی حکومت نے غزہ میں جنگی مہم کے لیے 8 ارب ڈالر کا بجٹ منظور کیا ہے۔ اسرائیلی افواج نے وارننگ پمفلٹ بھی تقسیم کیے ہیں، جن میں فلسطینیوں کو اپنی جان بچانے کے لیے علاقوں سے نکلنے کا مشورہ دیا گیا ہے۔