بہتر ہوگا اگر ایران پاک سعودی معاہدے کا حصہ بنے،پاسداران انقلاب

پاکستان اور سعودی عرب کے درمیان ہونے والا مشترکہ دفاعی معاہدہ خوش آئند ہے، اور بہتر ہو گا اگر ایران بھی اس معاہدے کا حصہ بنے۔

ایرانی پاسدارانِ انقلاب کے میجر جنرل اور سپریم لیڈر کے مشیر، رحیم صفوی نے کہا ہے کہ پاکستان اور سعودی عرب کے درمیان ہونے والا مشترکہ دفاعی معاہدہ خوش آئند ہے، اور بہتر ہو گا اگر ایران بھی اس معاہدے کا حصہ بنے۔

ایرانی میڈیا سے گفتگو میں انہوں نے کہا کہ اسلامی ممالک کو اپنے باہمی اختلافات بھلا کر مشترکہ چیلنجز کا سامنا کرنا چاہیے۔ ان کا کہنا تھا کہ امریکا کے خطے میں اثر و رسوخ میں کمی آ رہی ہے اور اس کی توجہ ایشیا پیسیفک کی جانب منتقل ہو رہی ہے، ایسے وقت میں علاقائی اسلامی سکیورٹی بلاک کی تشکیل نہایت اہمیت رکھتی ہے تاکہ خطے میں استحکام اور خودمختاری یقینی بنائی جا سکے۔

یاد رہے کہ حال ہی میں پاکستان اور سعودی عرب نے ایک مشترکہ دفاعی معاہدہ کیا ہے جس کے مطابق کسی ایک ملک پر حملہ دوسرے پر حملہ تصور کیا جائے گا۔