یو این سیکریٹری جنرل کا غزہ جنگ بندی معاہدے کا خیرمقدم

نیویارک: اقوام متحدہ کے سیکریٹری جنرل انتونیو گوتریس نے اسرائیل اور حماس کے درمیان طے پانے والے غزہ جنگ بندی معاہدے کا خیرمقدم کرتے ہوئے فریقین پر زور دیا ہے کہ وہ معاہدے کی تمام شرائط پر مکمل عملدرآمد کو یقینی بنائیں۔

اقوام متحدہ کی جانب سے جاری بیان میں گوتریس نے کہا کہ غزہ میں مستقل اور جامع جنگ بندی کو یقینی بنایا جائے، کیونکہ لڑائی ہمیشہ کے لیے ختم ہونی چاہیے۔ انہوں نے زور دیا کہ غزہ میں انسانی امداد، ضروری سامان اور تجارتی سرگرمیوں کا تسلسل برقرار رکھا جائے۔

انتونیو گوتریس کا کہنا تھا کہ اقوام متحدہ اس معاہدے کے مکمل نفاذ کی حمایت کرتا ہے اور غزہ میں بحالی اور تعمیرِ نو کے عمل کو آگے بڑھانے کے لیے تیار ہے۔

انہوں نے مزید کہا کہ اسرائیلیوں اور فلسطینیوں کو پائیدار امن کے لیے دو ریاستی حل کی جانب بڑھنا ہوگا، تاکہ خطے میں دیرپا استحکام ممکن ہو سکے۔

واضح رہے کہ اسرائیل اور حماس کے درمیان جنگ کے خاتمے اور یرغمال قیدیوں کی رہائی کے لیے مجوزہ امن معاہدے کے پہلے مرحلے پر مصر میں دستخط ہو چکے ہیں، جبکہ باضابطہ دستخط آج دوپہر متوقع ہیں۔

امن مذاکرات میں امریکی مندوب اسٹیو وٹکوف، صدر ٹرمپ کے داماد جیرڈ کُشنر، اور حماس رہنما خلیل الحیہ نے شرکت کی۔
امریکی صدر ڈونلڈ ٹرمپ نے سوشل میڈیا پر اعلان کیا کہ یہ معاہدہ ایک تاریخی پیش رفت ہے اور تمام فریقوں کے ساتھ منصفانہ برتاؤ کیا جائے گا۔