اٹلی کا فلسطینی ریاست کے قیام کی حمایت کا اعلان

 

شرم الشیخ: اٹلی کی وزیراعظم جارجیا میلونی نے کہا ہے کہ غزہ میں جنگ بندی معاہدے کے بعد اٹلی فلسطین کو بطور ریاست تسلیم کرنے کے پہلے سے کہیں زیادہ قریب ہے۔

مصر کے شہر شرم الشیخ میں امن کانفرنس کے دوران میڈیا سے گفتگو کرتے ہوئے اطالوی وزیراعظم نے کہا کہ اگر جنگ بندی معاہدہ مکمل طور پر نافذ ہوگیا تو اٹلی کی جانب سے فلسطین کی تسلیم شدگی ایک یقینی عمل ہوگا۔

انہوں نے واضح کیا کہ اٹلی فلسطینی ریاست کے قیام کی حمایت کرتا ہے اور غزہ کے عوام کے لیے انسانی امداد جاری رکھے گا۔

جارجیا میلونی نے مزید کہا کہ اٹلی غزہ میں امن و استحکام کے لیے عملی تعاون کے لیے بھی تیار ہے، اور اگر اقوام متحدہ کی قرارداد کے تحت ضرورت پڑی تو اطالوی کارابینیری فورس تعینات کی جا سکتی ہے۔

ان کا کہنا تھا کہ ’’اٹلی اپنا کردار ادا کرنے کے لیے پرعزم ہے، یہ ایک تاریخی لمحہ ہے اور میں فخر محسوس کرتی ہوں کہ اٹلی اس عمل کا حصہ ہے۔‘‘