اسرائیلی طیاروں نے غزہ پر فضائی حملے دوبارہ شروع کر دیے

غزہ: اسرائیلی وزیرِ اعظم بن یامین نیتن یاہو کے حکم کے بعد اسرائیلی طیاروں نے دوبارہ غزہ شہر پر فضائی حملے شروع کر دیے۔ خبر ایجنسیوں کے مطابق شمالی غزہ کے اسپتال کے قریب بھی حملہ کیا گیا، جس سے اسپتال کے اندر مریضوں اور طبی عملے میں شدید خوف و ہراس پھیل گیا۔ عینی شاہدین نے اس حملے کو بہت بڑا اور خوفناک قرار دیا۔

الجزیرہ کے مطابق اسرائیلی فوج نے غزہ شہر کے مختلف مقامات پر حملے کیے، جن میں ایک میزائل الشفاء اسپتال کے پیچھے گرا۔ اسرائیلی میڈیا کا کہنا ہے کہ یہ اقدام حماس کی جانب سے جنگ بندی معاہدے کی مبینہ خلاف ورزی کے جواب میں کیا گیا۔

مزید برآں، اسرائیلی میڈیا نے اطلاع دی کہ آج جنوبی غزہ کے علاقے رفح میں اسرائیلی فوجیوں پر حملہ ہوا۔