ترکیہ102ویں یومِ جمہوریہ کے موقع پرصدر،وزیراعظم،وفاقی وزیر داخلہ کی مبارکباد

پاکستان کی اعلیٰ قیادت نے ترکیہ کے 102ویں یومِ جمہوریہ کے موقع پر ترک عوام اور صدر رجب طیب اردوان کو مبارکباد پیش کی ہے۔

صدرِ مملکت آصف علی زرداری نے کہا کہ ترک قوم کی استقامت اور وژن پوری دنیا کے لیے مشعلِ راہ ہے۔ انہوں نے مصطفیٰ کمال اتاترک کی قیادت کو خراج تحسین پیش کرتے ہوئے کہا کہ پاکستان اور ترکیہ کے درمیان مذہبی، تاریخی اور باہمی احترام کے رشتے مضبوط ہیں اور دونوں ممالک نے ہر مشکل وقت میں ایک دوسرے کا ساتھ دیا۔

وزیراعظم شہباز شریف نے بھی صدر اردوان اور ترک عوام کو دلی مبارکباد پیش کی اور کہا کہ صدر اردوان کی قیادت میں ترکیہ نے شاندار ترقی و معاشی بحالی کا سفر طے کیا ہے۔ انہوں نے کہا کہ پاک ترک تعلقات عقیدے، تاریخ اور بھائی چارے کے بندھن سے جڑے ہیں اور اسٹریٹجک شراکت داری کے نئے دور میں داخل ہو چکے ہیں۔

وفاقی وزیر داخلہ محسن نقوی نے کہا کہ یہ دن ترکیہ کی خودداری، استقامت اور قربانیوں کی یاد دلاتا ہے اور صدر اردوان کی قیادت میں ترقی کا سفر نئی بلندیوں کو چھو رہا ہے۔ انہوں نے کہا کہ پاکستان اور ترکیہ کے عوام کے دل کسی جغرافیائی حد کے پابند نہیں اور مسئلہ کشمیر پر ترکیہ کا اصولی موقف آج بھی پاکستانی عوام کے دلوں میں زندہ ہے۔

وزیر اعلیٰ پنجاب مریم نواز شریف نے بھی ترک عوام اور صدر اردوان کو مبارکباد دی اور کہا کہ پاک ترک تعلقات دو عظیم اقوام کے باہمی ربط کا مظہر ہیں۔ انہوں نے دعا کی کہ پاکستان اور ترکیہ کا رشتہ ہمیشہ قائم و دائم رہے۔